Shillong: U Syiem jong ka Hima Mylliem ryngkat ki myntri ki la mynjur ban pynduh noh shi syndon ia ka jingot kilo be-ain ha Iewduh. Kane ka long hadien ka jingiakynduh kaba la long myn hynnin ka sngi hapdeng ki nongialam jong ka HFU, ki nongrep, u Syiem lem bad ki myntri ha office jong Syiem, ka Hima Mylliem.
Na ka liang jong ka HFU hapoh ka jingialam jong u bah Commander Shangpliang, President bad u bah Allfondbirth Kharsyntiew, General Secretary ki la ujor ruh ha u Syiem halor ka por ban die ki nongrep bad ki nongdie khutia. Ia kane ruh u Syiem lem bad ki myntri ki la mynjur ban pyntreikam kata ban aipor ia ki nongrep naduh ka por dangstep haduh ka por 2 baje katba ki nongdie khutia hadien ka 2 baje.
Kumta ki nongrep da ka jingangnud bad jingthrang dik dik jong ki Nongrep na kylleng ki jaka ki la wan sha office u Syiem ka Hima Mylliem, hadien ba ki la ioh khubor ba u Syiem u la khot ia ki nongialam ka HFU ban iakren halor kine ki jingeh.
Ha katei ka jingiakynduh na ka liang jong ki Myntri ki la pynpaw ia ka jingsngewkhia kaba jur bad khamtam ka jinghiar dor jong ki mar jong ki Nongrep ha kine ki sngi.