Shillong:Kum shi bynta ban lah ban teh lakam ia ka jingpur sted jong ka jingpang Covid -19 khamtam ha Nongbah Shillong,u Myntri rangbah ka jylla u Conrad K Sangma, u la khot ia ka jingialang ia ki MLA jong ki 7 tylli ki Constituency.
Haba iakren bad ki lad pathai khubor, na ka liang u Symbud Myntri rangbah ka jylla u bah Prestone Tynsong, u la iathuh,ba u Myntri rangbah u la khot ia ka jingialang jong ki 7 ngut ki MLA jong ka nongbah Shillong ban iakren halor ka jingkiewsted ka khlam Covid -19 khamtam ha nongbah Shillong.
Ha kane ka jingialang na ka liang ka sorkar ka la kyrpad ia ki MLA ba kin shim khia ban kyntu ia ki briew ha ki constituency jong ki, ba ki leit ban ai dawai Tika iada Covid ha la ki jong ki Constituency.
“Ngi la kyntu ia ki MLA jong ki 7 tylli ki Constituency ha Shillong ba kin kyntu ia ki paidbah nongshong shnong ha la ki jong ki Constituency ba kin mih ryntih ban ai ia la dawai Tika ban iada ialade na ka khlam Covid -19” u la ong.
Kawei ka phang kaba ki la iakren ka long ba ka sorkar ka la rai ba kan pynkhie im biang ia ki Constituency Covid Management Commitee ha kine ki 7 tylli ki Constituency.
“Ka sorkar mynta ka sngi, ka la rai ban pynkhie im biang ia ki Constituency Covid Management Commitee ha kaba la dep ban thaw naduh mynshem snem. Ka jingthmu ban pynkhie im biang ia kine ki Commitee ka long ba kin ioh ban pynlong ia ki jingialang kyrpang halor ka jingpang covid-19 bad lada don kano kano ka jingeh kin lah ban rah sha ka sorkar” u la ong.
U symbud myntri rangbah ka jylla, u la iathuh ruh ba ki don ki jingiakren bad ki jingai jingmut na ka liang jong ki 7 tylli ia MLA ha kaba iadei ban teh lakam ia ka khlam Covid -19.
Kawei na kine ka long halor ki khyrdop ba rung sha ka jylla (entry point) ha kaba na ka liang jong ka sorkar ka la iathuh, ba ki la dep ban pynmih ia ki jingbthah ba kino kino ki ba wan rung sha ka jylla kin hap ban leh shuwa ia ka RTPCR Test. Ula iathuh ruh ba la don ruh ka jingai jingmut jong ki MLA sha ka sorkar ban pynbuh shuh shuh ia ki kamra ha ki khyrdop iarung sha ka jylla ban ioh ban buh bun ki sample.
Halor kane ka jingai jingmut jong ki MLA ka nongbah Shillong, ka sorkar, ka la mynjur ban buh ia kane.Na ka liang u Symbud myntri rangbah u la pynpaw ka jingsngewnguh ia ki MLA ba ki long kiba kloi ban iatrei lang bad ka sorkar ban tehlakam ia ka khlam Covid ha ka jylla.
Phi don ban ong eiei?