Mynjur u CoE ban pynbeit Ïa ki kynrum kynram ha skulbah NEHU, katkum ka jingai por jong ka NEHUSU

Shillong: Ka seng ki samla pule jong ka skulbah North Eastern Hill University (NEHU) ka North Eastern Hill University Students’ Union (NEHUSU) ka la ai por shi taïew ïa ki bor pynïaid jong kane ka skul bah ban pynbeit mardor ïa ki kynrum kynram kiba la mih na ka jingleh thurmur haba ai ïa ki marks ha ka eksamin end of semester examination.

Mynta ka sngi 21 tarik u Jymmang ki dkhot jong ka NEHUSU hapoh ka jingïalam jong u Advisor u Rangdajied Marweiñ ki la leit ban buh da ka dorkhas ha ka ophis treikam jong u Comptroller of Exams ban dawa ba dei ban jurip biang sa shisien ïa ki jingthoh jubab jong ki samla pule ha ki college bapher kiba dang shu pyndep ïa ki eksamin undergraduate.

Ka seng NEHUSU ka la shong ïa ka jingïalang shi sngi ha shuwa kata ha ka sngi nyngkong jong ka taïew ban shim ïa rai da kawei ka sur kawei ka jingmut ba kam hun satia bad kam sngew lah shaniah ïa ka jing ai marks sha ki samla pule ha ka end of semester exam.

Kumta ka la dawa ban peit biang ïa ki answer sheet bad pynbna ha shuwa jong ka Post Graduate Admission khnang ba kan ym ktah ïa ka jingpule bad khamtam ïa ka lawei jong ki samla pule.

Haba kren bad ki nongpathai khubor ka nongbah u Advisor jong ka NEHUSU, u Rangdajied Marweiñ u la ong ba kane ka jingleh jong ki nonghikai kiba peit bad ai marks ïa ki jubab exam jong ki khynnah pule ka long ka bym shai shida.

“Ngi dawa ïa ki bor pynïaid ba kin scrutinize biang sa shisien ïa ki answer sheet namar kam long accurate,” ong u samla Rangdajied Marweiñ, “Ngin ai por shi taïew ba kin leh ïa kata lym kumta ngin pynlong da kam don ka jingiakren kaei kaba un leh bad lada um lah ngin shim da ki jingiakhih ban pynbor ia ka exam block”.

Katkum ka jingïathuh jong u Advisor ka NEHUSU, u CoE u la mynjur ban pynbeit ïa kine ki kynrum kynram bad u long la kloi ban pynphai ïa ki answer sheet sha ki samla pule kiba kwah ïa ka re evaluation.

“U CoE u la mynjur bad kubour ba un ai ïa ki paper lada don ki khynnah pule kiba sngew ki ioh duna marks bad ngi la ïakren bad ki khynnah bad ruh kynjoh ktien ïa ki para member ban ai recheck sha ki nonghikai,” la ong u Advisor ka NEHUSU ha kaba u la ban shuh shuh, “Accordingly, u CoE un sa pynlong ka jing correct hadien ba na ka liang jong ka seng ngin ai ka application sha ki bor pynïaid exam.”