Mynjur ka sorkar ia ka rai ka GST, hapoh 20 lak yn lait khajna ha ka jylla

Shillong: Ka jingialang ka kynhun myntri mynta ka sngi, ka la pdiang ia ka rai ka GST Council ban pyllait khajna noh ia kito kiba kamai hapoh 20 lak ha ka shi snem.

Haba pyntip ia kane, u symbud myntri rangbah u bah Prestone Tynsong u la iathuh ba mynshem snem, ka GST Council ka la buh kyndon ba kito kiba kamai 10 lak shaneng kin hap siew khajna hynrei dang shen ka la pynjynsur ia kane.
“Ka jingialang ka GST dang shen ka la pyllong ia ka jingialang ha kaba ka pynjynsur ia ka jingpynngat khajna ia kito kiba kamai hapoh 20 lak shi snem. Naduh mynta, kiban ngat khajna kin long tang kiba kamai 20 lak shaneng ha ka shi snem”, la ong u bah Prestone.
U la iathuh ba ka jingialang ka rai ruh ban jer kyrteng thymmai ia ka tnad Agriculture sha ka Agriculture and Farmers Welfare kumba la leh ka sorkar pdeng.