Mynjur ka Sorkar ban siew ka arrear ba T.47 klur, ki nonghikai SSA

Shillong:Ka Sorkar Jylla ka la mynjur ban siew pynkhuid noh ïa ka arrear ba pynsah haduh phra bnai jong ki Nonghikai SSA kaba kot sha ka T. 47 klur bad ïa kane yn siew da ka installment kaban sdang naduh u bnai Jylliew mynta u snem.

Kane ka la mih hadien ka mukotduma ba la mudui da ka Meghalaya Sarva Shiksha Abhiyan School Association (MSSASA) hapoh ka Ïingkashari Meghalaya High Court.
Ha ka hukum ba pynmih ka Ïingkashari ka la pynwai noh ïa ka mukotduma hadien ba ka Sorkar Jylla ka la pyntip ba ka la dep pynkhreh ïa ka formula ha kaban pyllait noh ïa ki arrear tulop ba dang sahteng jong ki nonghikai SSA.

“Ngi kmen ban pyntip sha baroh ki Nonghikai SSA ba ka Sorkar Jylla kala mynjur ban siew pynkhuid noh ïa ki arrear tulop ba sah (ba kot T. 47 klur) na ka bynta phra bnai-kata naduh ka 1 tarik Naitung 2016 haduh 28 Rymphang 2017,” ong u President ka MSSASA Bah Aristotle C Rymbai ha ka kyrwoh ba pyllait hynne ka sngi Palei.
Ula pyntip ba u Commissioner & Secretary ba khmih ïa ka Tnat Eduction u Dr BDR Tiwari ha ka shithi ba 4 tarik Ïaïong, 2023, ula pyntip ba ka Tnat Education kala pynkhreh ïa ka formula ban pyllait ïa ki arrear tulop ba sahteng jong ki nonghikai SSA.

“Ïa ka installment ba nyngkong yn sa pyllait ha u Jylliew 2023 (ba (1191.615 lak, installment ba-ar ha u Nohprah 2023 (ba T. 1191.615 lak), installment ba lai ha u Jylliew 2024 (ba T. 1191.615 lak) bad installment ba 4 ha u Nohprah 2024 (ba T. 1191.615 lak),” ong u Bah Rymbai.