Shillong:Ka tnat ka Koit ka Khiah ka sorkar jylla ka la mynjur ban siew bai lutksan kaba long T. 3 lak sha ka kmie kaba la duhnoh ïa la I khun ba dang shu kha, hadien ka jingbthah ba la pynmih da ka Meghalaya Human Rights Commission (MHRC).
Ha u bnai Naitung, 2020, lah ban pynkynmaw ba itei I khyllung ila khladnoh hadien ba katei ka longkmie ka la shah kyntait ban leit kha ha katei ka jaka sumar. La kynnoh ba la phah noh da katei ka hospital naba kadei napoh ka shnong Mawlai Mawtawar, kaba lah pynbna kum ka containment zone na ka daw ka khlam Covid-19.
Katba katei ka hospital ka la khot biang ïa katei ka longkmie hadien ka jingtuklar ki sengbhalang, kiba la leit rah ïa katei ka kam bad u DHS (MI) Dr Aman Warr, I khun jong ka ila khladnoh hadien ba lah dep kha.
Hadien ba la peit lyngba ka jingmih ki khubor, ka MHRC ka la shimti ïa katei ka jingjia da kaba lum ïa ki sakhi, kylli jingkylli ha ka 17 tarik u bnai Ïaïong, 2021.
“Haba pyrkhat ïa katei ka kam na baroh ki liang, kynthup ïa ka jingmynsaw jingmong bad jingsngewkhia ha ka jingmut jingpyrkhat ba la mad bad ka jingjulor ba la mad da ka lanot ne ka kmie ba la duhnoh la I khun, ka meij ba pura jong ka commission ka pynmih ka hukum ha ka 1 tarik u Naiwieng, 2021 bad pynskhem ïa ka jingdonkam ban siew bailutksan T. 3 lak sha ka lanot,” ong ka kyrwoh khubor na ka MHRC.
Ka commission ka la khmih da kaba ong ba ka sorkar jylla kadei ban ai ka jingpyrkhat kaba biang ïa ki jingmynjur ba la pynmih bad kam dei ban pynlong ïa ka lanot ban dang jynjar shuh shuh ban wad nongsaid aiñ ha ka jinglut kaba heh kaba kan ym lah ban pynbiang.
Phi don ban ong eiei?