Mynjur ka sorkar ban ai shuti ia u DGP ka jylla, ong u myntri rangbah

Shillong: Wat la haba bun ki jingpyrshah ki mih na kiba bun balang kiba la buh jingkylli na ka Sorkar Jylla ba kumno ka Sorkar kan ailad ne pdiang ia ka jingpan shuti leit ïing jong u Director General of Police(DGP) jong ka Jylla, u R Chandranathan haba ka jingtohkit Judicial Enquiry ka dang iaid shakhmat mynta hadien ka jingshah siat iap jong u Bah Cheristerfield Thangkhiew kaba la jia ha ka 13 tarik u bnai Nailar 2021 ha ka ïingsah jong u ha Mawlai Kynton Massar.

Haba kren sha ki lad pathai khubor, u Myntri Rangbah ka jylla, u Conrad K Sangma, u la ong ba ka Sorkar ka dang iaid mynta katkum ki kyndon bad ynda la pyndep lut ia ki jingdonkam baroh, ka Sorkar kan sa ai ia ka shuti leit ïing ia u DGP ka jylla u ba la pan shuti bad ka Sorkar kan nym lah satia ban khanglad ia ka jingpan shuti jong u DGP namar u don la ka hok ban shim shuti kum u shakri Sorkar bad na ka liang jong ka Sorkar Jylla ruh ka la mynjur ban ai shuti leit ïing ia u DGP ka jylla.

Ha kaba iadei bad ka jingdawa ban sospon shwa ia ki heh pulit kiba la donkti halor katei ka jingjia, u Conrad K Sangma u la ong ba ka Sorkar ka ieng beit ha kajuh ka nongrim kata ba kan nym pat lah satia ban weng kam ia kitei ki heh pulit katba ym pat ioh ka kaiphod tohkit kaba paka.