Mynjur ka Puja komiti, ban nym bret Blei ha Wah Myntdu

Jowai, 4 Naiwieng:
Na ka bynta ban iada ia ka wah Myntdu, ka bor District ha ryngkat ka jingiatreilang ka Jowai Puja Committee kila shim ia ka rai ban nym bret ia ka Blei Durga ha wah Myntdu.
Ka wah Myntdu kadei ka ba bsa um ia ka shnong Jowai bad kaba ki nongjwai ki khien kyntang kum ka Syiem Myntdu bad ka jingpynjakhlia ia kane ka wah kan buh jingeh kaba khraw ia ki paidbah nongshong shnong.
“Katkum ka jingiakren bad ka rai kaba ngi la shim, ka Puja Committee ha Jowai kan nym bret satia ia ka Blei thaw Durga ha katei ka wah ha kane ka Durga Puja mynta u snem”, la ong u DC ka WJH, u Arun Kr. Kembhavi.
Ha ka jaka ban bret ha ka wah, ka bor district kan pynshna iaka Tangki kaba heh haduh 8x8x4 feet kaba la shna kyrpang da ki kynja nar tin bad ia ka Dur Blei yn pynngam ha Syntu Ksiar bynta ka wah Myntdu bad yn sa sei noh hi mar mar bad yn sa pynngam ha katei ka Tangki ba la pyndep da ka um. Hadien katta katei ka um ha Tangki yn sa pyllait ia ka sha ka thliew ring um bad yn ym don kawei ruh ki tiar shna Blei kin ngam ha wah Myntdu.
Kane kadei ka sien kaba nyngkong ha WJH bad ha ka jylla ruh kumjuh. “Ngi khmih lynti ba ki Puja Committee ha ka jylla kin bud ia kane ka nuksa ban iada ia ka mariang”, la ong u DC ka WJH.