Mynjur ka kabinet ban thung Chairperson ia ka Lokayukta

Shillong, 17 Risaw:
Ka jingialang jong ka kynhun myntri hynne ka la mynjur ia ki rule ba la thaw da ka Search Committee na ka bynta ban thung ia u ne ka chairperson bad ki dkhot jong ka State Lokayukta.
U myntri rangbah ka jylla u Dr Mukul Sangma hadien ba la wai ka jing ialang mynta ka sngi u la ong ba ka sorkar ka la kut jingmut ban pyndep ia kane ka kam ban thung ia ka Lokayukta ha ka jylla.
Ka Search Committee kan don san ngut ki dkhot bad uwei u chairperson
bad kan nym don kano kano ka jingsiew ia ki dkhot hynrei ia u
chairperson yn ioh T.2500 ha man ka jingiashong jingialang katba ia kidkhot kin ioh T. 2000 lem bad ka TA bad ka DA na ka bynta ki Grade- 1 officer jong ka jylla haba ki leit ban shong ia ka jingialang. Lah ban kdew ba ka la don ka jingiakhih kaba jrong bha ha ki snem bad bnai ba la dep ban dawa pynurlong ia kane ka Lokayukta ha ka jylla Meghalaya. Kane ka Lokayukta kan bishar ia ki kam bamsap jong ki nongtrei sorkar bad ban pynshitom lada lap ia ka jingshisha katkum ka ain. Ia ka Meghalaya Lokayukta Act la pas ha u snem 2014 ha ka dorbar kaba long ha u bnai Lber.