Mynjur ka iing dorbar ka KHADC ban pyrshah ia ka CAB

Shillong: Ka dorbar tlang ka iing dorbar ka Khasi Hills Autonomous District Council (KHADC) kaba long myn hynnin ka sngi, ka la shim da ka rai ban pyrshah ia ka Citizenship Amendment Bill (CAB) ka sorkar pdeng.

Ki dkhot na ka liangsynshar bad na ka liangpyrshah kila pynpaw ia kajuh ka sur ka jingpyrshah ia kane ka CAB.

La wanrah ia kane ka mat na ka liang ka Executive Committee da u Executive Member u bah Titosstarwell Chyne bad la kyrshan da ka iing baroh.
Ka Rai ka long ban kyntu ia ka sorkar pdeng ba ia ka ain CAB ym dei ban pyntrei kam ha ka jylla Meghalaya bad kyrpang ha ki jaka kiba hap hapoh ka jingpeit jong ka District Council.
Haba wanrah ia katei ka rai, na ka liang jong u EM ba dei peit ia ka khyndew ka shyiap u Bah Titosstarwell u la ong ba lyngba kane ka rai jong ka iing dorbar kin phah sha ka sorkar pdeng ban pynpaw ia ka jingpyrshah ia ka CAB, 2016 kaba kane ka sorkar BJP ka thmu ban pynlong ain mynta.
Na ka liang jong u bah Ronnie V Lyngdoh u MDC ka Congress na Mylliem, u la ong ba lada kane ka CAB jong ka BJP kan trei kam kan long ka jingma ia ka jaidbynriew rit paid.
U la kynthah ia ka UDP da kaba ong ba ka dei ka kynhun jong ka NEDA kala dei ban ong ia u Himanta Biswa Sharman nongialam ka BJP ba kin pyrshah ia ka CAB bad lada u pyrshah ia ka CAB, ma u (Bah R V Lyngdoh) ruh un rung noh sha ka NEDA.
Kiwei pat kiba iashim bynta ki long u bah Paul Lyngdoh u la ong ba kan myntoi aiu kata ka lama UDP, lama Congress bad kiwei kiwei lada kane ka CAB kan treikam, bad u la ong ba lada ka sorkar pdeng ka leh don bor, yn pynkylla ka phang pdeng jong ka jingiakren ha ka pyrthei.
Kiwei ki para MDC kiba la ia shim bynta ban ia kren ki long u Chief Executive Member u Bah Teinwell Dkhar, u Bah MN Mukhim, Bah Lambor Malangniang, bah Bindo M Lanong ha kaba u la ong ba ka ki seng reiwlum na North East ki Pyrshah ia ka CAB bad ia kane kila ia kren ha ka jingialang jong ka NEDA mynta u snem ha Guwahati.
Kiwei kiwei kiba la ia shim bynta ki long u nongialam ka liang pyrshah u bah Lamphrang Blah, Bah Batskhem Ryntathiang, Bah Carnes Sohshong, Bah Charles Marngar, Bah Gabriel Wahlang, Kong Grace Mary Kharpuri.