Mynjur ia ka VAB hapoh 10 tarik,ne ngin iaid da kawei ka lynti, ong ka SKRS

Shillong, 23 Nailar:
Ka jingialang bah jong ki Rangbah Shnong ba la khot da ka Synjuk Ki Rangbah Shnong (SK RS) sor bad khapsor kaba la long ha kane ka sngi Saitjain, ka la rai ban ai por haduh 10 tarik Nai lur ia u Lat ka jylla u V Shanmuganathan ba un pdiang noh ia ka Village Administration Bill (VAB) jong ka KHADC bad ka JHADC.  Hynrei, lada ym mynjur hapoh kane ka sngi, kin sa pyr khat ban iaid da kawei ka lynti kaba kin sa ia rai hadien.
Ha kajuh ka por, ki la rai ruh ba ka sorkar ka dei ban pyndam noh shi syndon ia ka Ordinance ba ka mynjur da u Lat ka jylla.
U president ka SKRS u Dr. Werlok Kharshiing u la ong ba ka jingialang ka la shim ia kane ka rai hadien ba la iatai sani bha ia ka jingshah ktah jong ki paidbah namar ka jingkhang ka Kashari Meghalaya High Court ban ai syrnod ia ki nongshong shnong.
“Ngin phah ka jingthoh sha u Lat ban ai por haduh 10 tarik, Nailur, 2015 ba un mynjur bad shon muhor noh ia kine ki ar tylli ki Bills kynthup jong ka KHADC bad ka JHADC khnang ban pynkupbor ia ki Rangbah Shnong ha rilum Khasi bad Jaiñtia,”  la ong u Dr Kharshiing.
U la ong, ba lada u Lat um ai ka jingmynjur hapoh katei ka por ba la buh, ki Rangbah Shnong hapoh ka lama ka Joint Action Committee (JAC) kin sa iashong biang ban shim da kawei ka lynti iaid jongki.
U  General Secretary ka Synjuk ki Rangbah Shnong u Bah RL Blah u la iathuh ba ka synjuk ka la dep iakynduh ia u Lat ka jylla haduh ar sien ban pynsngew ia u ia ka jingdonkam ban mynjur noh ia ka VAB hynrei haduh mynta u khlem leh eiei.
U la ong ba  um tip shuh balei u Lat ka jylla u leh pynslem ban ai ia ka jingmynjur ia kine ki Bill bad bynrap, ba lehse ka jingbym leh kyrkieh jong u Lat ka lah ban dei ba u dang donkam ban sngewthuh khambha halor kine ki ar tylli ki Bill khamtam  namar ba u dang shu wan shimti dang shen kum u Khlieh ka Jylla.
“Ngi la rai ba ka sorkar ka dei ban pyndam noh ia ka Meghalaya Local Administration (Empowerment of Traditional Institutions, Traditional Bodies, Headmen in Governance and Public Delivery System) Ordinance, 2015″ la ong u  Dr. Kharshiing.
Ka Synjuk ki Rangbah Shnong  ka la rai ban pyrshah ruh ia ka jingkyntur pud ka MUDA sha ki shnong kiba don shabar na u pud u sam ka Municipal.
“Ngi la rai ruh ban pyrshah ia ka jingkyntur pud ka MUDA bad ngi pdiang ia ka Bye Laws ka KHADC kaba ai jingbit shna ia ki hapoh u pud u sam jong ka”, la ong u Dr Kharshiing.
Ha kane ka jingialang la pynskhem ruh ia ka Synjuk ki Khlieh Nongsynshar Shnong ka Bri u Hynñiewtrep ba kynthup ia ki nongsynshar baroh Khasi bad Jaintia bad ban pyntyllun ia ka kam, la aiti ha ka Executive Committee jong ka JAC ban leh ia kaba donkam haduh ban da ioh ia ki nongkitkam kiba pura.