Ma editor,
Ngi sngew nguh sngew pyrto ia phi bad ia baroh ki kot khubor, ba phi long kum ka dpei ne mawbyrsiew bym ju lip ban pynsyaid bad pynsngew ia ki jingeh ba ki parabriew ki ia kynduh, ngi ki nongthoh shithi nongthoh article ngim ju ioh bainong hynrei ngi iai thoh wat la ngim ioh bainong namar ngi iohi ia ki jingeh ba ki para briew ki ia kynduh bad ngim lah hi ruh ban shu sngap ne kun tang ha lade.
U minister ba don burom (ka burom bym don ba lah hi ruh ban thew) u ba dei peit ia ka thngan ka kdang bad ka jynit ka tyrsaw u sngap bad rieh kyndong katba ki sengbhalang bad riew paidbah padde ki ud ki nam na bynta ki jingeh ba ki ia kynduh ha kum kane ka por. Kaba pyndiaw ia bun ki nongthoh shithi ne nongthoh article ka long ba la niew ia ki tang kum ki nonglorni ne nongwohdong bad don lei kiba ong ba ki dei tang ki ksew surok ne ksewbnalad kiba shu thoh tang dep rukom ban pynhun ia ka jingsngew shi met. To kam lei lei ai ka pyrthei kan niew bein haba ngi kren ia ka ba dei, kham lah u riewkhlaw uba nud ban kren ia kaba dei ban ia u riewdonburom uba leh bym suidniew bad bym pyndonkam hok iala ka bor; kham lah ki riewkhlaw kiba kyrkait bad hylla na bynta ki paidbah ban ia u riewdonburom uba rieh ia lade ha ka kamra ksiar bad peit kai pat ia ka jingeh ba ki paidbah babun ki ia kynduh.
Ka khubor ba mih ha ka 6-5-2020 (ym ha U Rupang) ka la sangah tyngeh ia ka jingmatlah ki bor ba dei peit ki bym shym la kitkhia ban peitngor ban iarap bad pynsting ia ka jingeh ki paidbah nongkyndong ha kum kane ka por.La biang ha sor, ki nongkyndong mat dep shato imat.Ai na khmat lute nadien.Ka G.S.T bad kiwei ki khajna ki neh kumjuh, kiew dor khyllah pat ki marbam ha ki dukan nongkyndong.Uba heh u la nangkhraw,uba raitoi u la nang sdot.Mano ba aibor ia ki heh ban nion bein ia ki duk ki raitoi? Ym don department imat ha Meghalaya ban tuklar ne regulate ia ka dor ki marbam? Hato ki bor shnong Kim mon seh ban peitngor ia ka jingkiew dor khlem nongrim ki marbam? Ne dei ka sorkar kaba leh khnang ia kane? Hato ki nongialam shnong Kim tip seh ban pynbna paidbah bad Maham ia ki nongdie ba u khaw dei ban die 660 ne 680 tyngka 25 kilo? Ka shini 42 ne 45 shi kilo kumta ter ter? Ne hato ka sorkar bad ki mahajon ki iadonkti lang ban leh ia kane ka kam? Ka sorkar ka bthah ia ki bor shnong ban pynbna paidbah ba ki kali ban kamai dei tang ki ML0…. ba kut ha u 0,1 ,ne 2,3 …. kumta ter ter.
Don jingeh aiu pat ban aibor ha ki dorbar shnong baroh ba ia ki marbam dei ban pynbna paidbah da ki mait ne tynghung ba ia ki marbam dei ban die kat kum kine ki dor ba pynbna? Ne hato ka G.S.T bad kiwei ki khajna ki kiew sop sop ha ka por lockdown,lada ki kiew te shu biang hi tharai tang ban dap ei ka pla sorkar! Ngi iaroh ia ka sorkar ba ka la iarap lem u khaw,ka pisa ia ki paidbah.Hynrei lada ka dor iew u khaw ka long haduh 1900 ne 2000 tyngka 100kg kumba paw ha kot khubor, ki longiing ba don 10 ngut kin iabam ja 6kg shi sngi na bynta 16 sngi bad shah thngan noh 14 sngi.Haba kumne haei ka hok longbriew manbriew?
Hato ngi hun ban iohi ba ki kmie ki kpa kin ia iam lang bad ki khun na bynta ka shini,ka dawai ? Ki paidbah hi kim kwah ban shu ap na ka sorkar katba don,kumta ngi kwah ban iohi ba ka sorkar kan tuklar ia ka jingkiew dor khlem nongrim jong ki marbam.
Ronik T Ryntathiang
Phi don ban ong eiei?