Shillong: Ka kynhun jong ka PDA ha KHADC ka la mudui sha ing kashari halor ka jingjied CEM ha KHADC kaba la long myn hynnin ka sngi. U nongialam ka PDA u bah James Ban Basaiawmoit, u la ujor myn hynnin ka step sha kashari bad ka kashari ka la shim ba ka sorkar jylla, KHADC bad ka Protem Chairman ki dei ban jubab hapoh shi taiew.
Haba kren sha ki nongthohkhubor myn hynnin ka sngi, ka kong Grace Mary Kharpuri kyrtong CEM ka la ong ba kam shym la poi sha ka elekshon jied CEM, naba kam dei satia kaba la iaid katkum ki kyndon aiñ. Ka la ong ba kaba nyngkong ka dei ba ki khlem ioh satia ia ka jingtip ha ka por kaba biang ba kan don ka elekshon jied CEM mynta ka sngi hynrei ki MDC ki la ioh jingtip ha ka por 8 baje mynstep katba ka elekshon pat ka long ha ka por 11 baje mynstep, “1 baje shiteng miet u Peon ka District Council u wan tied jingkhang ha ing jong nga ban wan ai ia ka Notice, ki paralok MDC jong nga ki ioh jingtip ha ka por 8 baje mynstep” ka la ong.
U bah James Ban Basaiawmoit pat u la ong ba la shu leh hak dak ia ka elekshon jied CEM da kaba iaid lait ia ka Rules 32. U la ong ba u Lat u la buh tarih elekshon ha ka 12 tarik, hynrei namar ka jingrisaiñ u Chairman, ym shym la lah ban pynlong ia ka elekshon hynrei la buh biang ha ka sngi kaba bud, “La dei ban jied shuwa ia u chairman nyngkong eh ban pyniaid ia ka elekshon, haba u chairman u la risaiñ ka pyni ruh ba ka kot thep kyrteng ki kyrtong CEM ka la iap bad hap ban thep da kawei pat” u la ong da kaba iathuh ba ka kashari ka la shim ba ka sorkar jylla, ka KHADC bad Protem Chairman ki hap ban jubab ia katei ka jingujor.
Nga risaiñ naba kim shaniah shuh: L.G Nongsiej
Ka jingrisaiñ ba kyndit jong u bah L.G Nongsiej na ka kam Chairman ka KHADC shuwa ka elekshon jied CEM, ka la pynkyndit ia kiba bun bad ka la pynbitar ruh ia ki MDC kiba don mynta ha ka liang synshar, namar ba dei lyngba ka jingrisain jong u ba ym shym la lah shuh ban pynlong ia ka elekshon jied CEM ka KHADC ha ka 12 tarik, hynrei la rah pat sha ka 13 tarik. Shibun ki jingkynthoh ki la mih na ki MDC halor katei ka jingrisaiñ ba kyndit u Chairman.
Hynrei haba ia kren markhmat mynta ka sngi bad ki nongthohkhubor u bah L.G Nongsiej u la ong ba ka daw ka jingrisaiñ jong u ka dei namarba ki MDC ka KHDA kim shaniah shuh ia u, “Nga risaiñ ba kim shaniah shuh ia nga” u la ong. Haba kylli u la jubab ba ha ka sngi ba u Lat u la hukum ban pynlong dorbar ia tynjuh bor, ki MDC ka KHDA ki la wanrah ia ka mat bym shaniah shuh pyrshah ia u ban pynpaw ba kim shaniah shuh ia u bad ia kane ka mat la wanrah da u MDC ka NPP u bah Pyniaid Sing Syiem.
“Nga dang mut ban pyniaid beit ia ka dorbar kumjuh ruh ia ka elekshon ban sa wan, nga ruh nga la don jingmut hi ban risaiñ hadien ba la dep ban pyniaid beit ia ki kam ki jam naba ngam sngew don hok shuh ban dang shong ha ka shuki hadien ba ka kynhun kaba nga don ka ka la khyllem, hynrei haba nga peit ha miej jong nga ka don ka shithi ba ki buh NC, kumno ngan bteng ia ka kam haba kim shaniah ruh, kim lah ap shuh ba ngan risaiñ hi ruh” u la ong.