Mudui ka Amra Bengalee ha Supreme Court, ba pyntreikam da ka ain ILP ha Manipur

New Delhi:Ka Supreme Court, ha ka 20tarik Naiwieng, ka la ai por 8 taiew ia ka sorkar Manipur, ba kan jubab halor ka jingkyrpad kaba tuklar ia ka rukom ai Inner Line Permit (ILP) ha katei ka Jylla.
Dei ban kdew ba ka jylla Manipur ka dei ka jylla kaba saw hadien ka Arunachal Pradesh, Nagaland bad Mizoram ha kaba ka synshar ILP ka treikam.

Ki briew kiba nabar, kynthup ia ki briew na kiwei pat ki jylla jong ka ri, ki donkam ia ka jingbit ban leit sha ki jylla kiba synshar ia ka ILP.
Ka bench jong ki nongbishar u Hrishikesh Roy bad u SVN Bhatti ki la ai por ia ka Manipur hadien ba u nongiasaid ain jong ka sorkar jylla u la pan por.
Ka iingbishar ba ha khlieh duh ha ka 3tarik kyllalyngkot, 2022 ka la pynmih ia ki jingpynbna sha ka Centre bad sha ka sorkar Manipur bad kiwei kiwei halor ka jingkyrpad ba la mudui da kawei ka seng kaba la ai kyrteng ‘Amra Bangalee’.

Ka jingkyrpad ka la kynthoh ba ka ILP ka ai bor khlem jingkhang ia ka jylla ban khanglad ia ka jingrung jingmih jong ki briew ki bym dei ki trai ri trai muluk ne kito ki bym dei ki nongshong shnong ba pura jong ka Manipur.
Ka seng ka la ong, “Ka rukom ILP kaba tyngeh ka long kaba pyrshah ha ka nongrim ia ki polisi jong ka jingpyniasoh lang ha ka imlang sahlang, ka roi ka par bad ka jingkiew jong ka teknoloji ha ka thain kaba shabar jong u Inner Line, nalor ba ka khanglad ia ka kam jngohkai pyrthei hapoh ka jylla, kaba long ka lad kamai kaba kongsan na ka bynta kine ki thain.”

Katei ka jingkyrpad, ka la tuklar ruh ia ka kyndon ai jingbit jong ka Manipur Inner Line Permit, 2019.
Ka la pynpaw ba ka hukum jong u snem 2019 ka pynkheiñ ïa ki hok ba kongsan jong ki nongshong shnong ba la pynskhem katkum ki kyndon 14, 15, 19 bad 21 jong ka riti synshar ka ri namar ba ka ai ïa ka bor bym biang ïa ka jylla ban khanglad ïa ka jingrung jingmih jong ki briew ki bym dei ki trai ri trai muluk.