Nongstoiñ, 03 Nohprah:
Ka A=Apple Society ha ryngkat ka jingiatreilang bad ka Department jong ka Horticulture, West Khasi Hills ha ka 6 tarik mynta u bnai kan pynlong iaka jingiakop thei bhabriew ne ka Miss Nongstoin bad ka Fruit wine festival hapoh Nongstoin, Children’s park.
Katei ka tamasa kan sdang naduh ka por 9:30 mynstep, da ka jingai jinghikai kumno ban shna bad pynmih wain na ki soh ha kaba ki nongwan ai jinghikai kiba dei na Shillong bad na Mairang kin sa ai jingbatai ha katei ka sngi iaki briew kiba don jingmut ban shna bad pynmih wine napoh ka thain West Khasi Hills.
La ong ruh ba ki nongshna wain, na kylleng ka jylla kin sa wan ban pyni nam ia ki umsoh wain ba la dep ban shna.
Haba phai pat ha ka jingiakop Miss Nongstoin 2017 ka jingpynkhreh kala iaid shaphrang ha kaba 24 ngut ki thei bhabriew na kylleng jong ka West Khasi Hills ki la mih shakhmat ban ia ia aireng ha katei ka lympung kaba heh tam hapoh West Khasi Hills District.
Ia katei ka jingiakop Miss Nongstoin la pyniaid da ka A=Apple Society, Nongstoin ha kaba katei ka jingiakop kadei ka sien kaba ar hapoh ka District naduh u snem 2016 ia kaba la pynlong hapoh ka dewlynnong Nongkhnum.
Haba iakren bad ki nongthoh khubor ki nongpyniaid ki la iathuh ba haduh mynta ki la dep ban leh iaka photo shoot kaba ar sngi lynter ia kaba la aiti ha ka Nongstoin eco Tourism & Photographic Society (NeTPS) bad myn ha ka sngi saitjain jong ka taiew, la lah ban pyndep ia ka audition ban jied ia kiba bit tam ban ia aireng ha katei ka lympung jingiakob miss Nongstoin bad lyngba ka audition la lah ban jied haduh 24 ngut ki thei bhabriew ki ban ia aireng ha katei ka lympung.
Kum ban shu pyntip sha ki paitbah kiba don jingmut ban wan peitkai ha katei ka Fruit wine festival, kin don ruh bun jait ki jingpynbyrngia kiba kynthup naduh ki jingrwai, ki jingshad bad kiwei kiwei, namar ka jingrit jong ka jaka, ka society kaba pyniaid ia katei ka prokram ka pyntip paitbah ba kin thied noh kham kloi iaki ticket namar ioh ba kim ioh ban rung sha katei ka jaka kaba pynlong ia katei ka jingiakop Miss Nongstoin.