U khlur ialehkai ba pawnam jong ka pyrthei u Christiano Ronaldo u la mih noh na Real Madrid ban leit iasoh bad ka Juventus ka klob kaba na ka ri Italy, ia kane la pynbna da ki bor pyniaid jong ka Real Madrid mynta ka sngi. “Ka Real Madrid ka ai khublei ia u Ronaldo u khlur ialehkai uba tbit tam ha ka pyrthei bad u khlur ialehkai ba tbit tam ha ka khana pateng jong ka Real Madrid bad ha ka pyrthei baroh kawei” ong ka khubor na ki bor pyniaid jong ka Real Madrid.
Ym shym la pyntikna satia ia ka sor ba u Ronaldo u la ia soi bad ka Juventus hynrei ki lad pathai khubor na Spain ki ong ba ka poi sha ka 105 Million Euros (120 million dollar) ryngkat ka kontrak kaba 30 million euros shi aiom ialehkai. Ha ka jingthoh kaba la buh ha ka website jong ka Real Madrid u Ronaldo u la ong ba ka por bad ka samoi kaba u don hapoh ka Real Madrid ka dei kaba kmen tam.
“Nga don tang ki jingai khublei ia ka klob, ki nongkyrshan bad ia katei ka nongbah hynrei nga sngew ba ka la dei ka por ban leit sha ka rynsan kaba thymmai ha ka jingim jong nga bad nga la pan na ka klob ban pyllait noh ia nga, nga kyrpad ia iwei pa iwei bad ia ki nongkyrshan ba kin sngewthuh ia ka jingmih noh jong nga” ong u Ronaldo. U Ronaldo u dei u khlur ialehkai uba la ioh ban khur bunsien ia ka khusnam Ballon D Or.