Mih u President barim ka BJP

Jowai, 21 Jymmang:
U President barim ka BJP ha West Jaintia Hills, u ma JG Kyndiah uba dei ruh u nongiasaid ain, u la rai ban iehnoh ia ka seng katkum ka khubor kaba u la pyllait paidbah ha kane ka sngi Saitjain na ka daw ki kam shimet jong u.
U Ma JG Kyndiah u la bat kum u President ka BJP ha WJH naduh u snem 2013 haduh 2017 bad ha une hi u snem ka party ka la pynkhamti noh ia katei ka kam ha u MDC ka Jowai North, u ma Marki Mulieh kum u President ka Party. “Kane kadei ka seng sain hima sima kaba nyngkong eh kaba nga la pyniasoh ialade bad nga la bat kum u President jong ka ha West Jaintia Hills naduh u snem 2013 haduh 2017 bad nga la trei borbah met bad mynsien na ka bynta ka party”, u la ong ha ka kyrwoh khubor.
U la pynpaw ruh ba ka rukom treikam ka seng ha kine ki khyndiat por ka la long kaba eh ban pdiang bad kane ka la pynlong ia u ban don ka jingsngew ba kam dei shuh ka party kaba don ka juh ka nongrim kaba ka don ha ka por ba u la pyniasoh nyngkong bad ka party.