Mih U Anna, ban pyrshah ia ka ain khyndew U Modi

New Delhi,
23 Rymphang:
U Anna Hazare, ula sdang biang ia ka jing ia khih jongu mynta ka sngi, da kaba pynlong ia ka jing ialang paidbah ha Jantar Mantar, na ka bynta ban pyrshah ia ka ain shim jaka jong ka sorkar India, lane ka Land Acquisition Bill.
U Hazare, u shim ba ka jingleh jong kane ka sorkar U Modi, ka long kaba pyrshah nongrep bad U Hazare, ula rai ba un ia khun pyrshah ia ka, katba kane ka sorkar pat, ka la rai ba kan iaid beit sha khmat, ia katei ka ain, kaba dei kaba la shu mynjur da U President haduh mynta lane ka Ordinance.
U Anna, ula rai ruh ban pynlong ia ka jingiakhih kaba kham heh shuh shuh ha ka madan Ramlila, lada jia ba ka sorkar jong U Modi, kam sngap ia ki jingdawa jongu. U Hazare, u ong ba katei ka jingialang paidbah kaba ar sngi, kan bud sa ka jingleit kaba kylleng ka Ri, ban pynsngewthuh ia ki paidbah, halor ka jinglong pyrshah nongrep jong kane ka sorkar, da kaba pyntreikam jubor ia katei ka ain lane ka Ordinance.
“Lada kane ka sorkar kam weng noh ia kane ka ain, kumta u paidbah ruh, un dang iai bteng ia ka jing ia khih pyrshah jongu. La iathuh ba ki nong ia khih, kin pynsngewthuh ia ki nongrep, halor ka jingma jong katei ka ain bad ka don ka jingthmu ban lum ia baroh ki nongrep, ha ka madan Ramlila ha ki lai lane saw bnai ban sa wan” ula ong shuh shuh.
U Anna, uba 77snem ka rta, u don ka jingsngew pyrshah jur, ia ki rai jong kane ka sorkar, ban pyn kylla ia ka ain bat khyndew.
Ha kawei pat ka khubor, la iathuh ba u myntri rangbah ka Delhi, U Arvind Kejriwal, ula mynjur, ba un leit shim bynta lang bad U Hazare, ha ka jingialang paidbah jongu, ka ban long lashai ka sngi.
La iathuh ba U Kejriwal, ula leit ia kynduh mynta ka janmiet, ia U Hazare, ha ka jaka sah jongu ha iing sorkar jong ka Maharashtra ha New Delhi, ha kaba ula dem ngon bad ktah ia ki kjat jongu.