Mih tender ha u 2018, ki nongioh tender ki khlem pyntrei Surok na Mawkarah sha Jakhong

Jakhong: Ka jingshemlanot bad ka jingbym suidniew jong ka sorkar ban siang rong noh ia ka surok PWD ba na ka shnong Mawkarah sha Jakhong ka la wanrah shibun ki jingeh ia ki 5 shnong kiba iaid lyngba katei ka surok. Te ka seng kynthei jong ka shnong Jakhong, lyngba ka jingialam jong ka V.O Iamynjurlang ki la rai ban iamih paidbah ban maramot hi noh ia katei ka surok ha ka 6 Tarik Naitung, 2019, ha kaba kin sdang ia ka jingmaramot ia katei ka Surok PWD Jakhong na Khlieh Bir bad kin pynkut sha ka shnong Umpongdeng.
Ki Nongshong Shnong jong ka Shnong Jakhong, ki la ioh ka Surok PWD (Surok Khyndew) naduh u snem 2002 bad haduh mynta kim pat ioh satia ia ka surok rong. Ka shnong Jakhong ka la don palat 50 snem mynta bad don kumba 160 iing eiei bad ka hap ha ka Hima Nongkhlaw, Mairang Parliamentary Constituency, Mairang Civil Sub-Division bad C&RD Block, West Khasi Hills District. Ki nongialam khmat kum ki sordar, ki seng kynthei, seng samla ki la ialeit na ka por sha ka por ban leit kynduh ia ki nongmihkhmat bad ki nongtrei sorkar ban pyntrei noh kham kloi ia ka surok phewse kam shem la poi shaei shaei. Hadien ba la pynmih tender ha u 2018, ki nongioh tender ruh ki khlem pyntrei satia ia ka surok ba kim lah shuh ban trei.
Katei ka surok na Mawkarah sha Jakhong ka long ka surok ba khongsan tam ia ki 5 tylli ki shnong jong katei ka thain. Ka shnong ka thaw ka sah dien ha ka ioh ka kot ne ha ki ba bun ki liang tang na ka daw bym biang ka surok. La don ki por ba ki longkmie ki hap kha khun ha surok, ha ka por ba ki dang kit dang bah ia ki ban leit kha sha hospital bad la don ruh ki ba la khlad noh shiteng lynti ha ka por ba leit phah sumar. Ki shnong ha kine ki thain ki long ki ba seisoh bha tangba ka jingbym biang ka surok ka la shu pynsahkut ia ki jingthung jingtep tang ha kaba shu bam ialade bad ai sniang bad ym lah satia ban pynpoi sha ki iew ki hat. Ki kali lada ki iaid ha katei ka surok PWD Jakhong ki hap ban teh da ki kynjri ia ki shaka, namar ba kim lah satia ban iaid. Ki don shibun ki jingeh kiba ki briew ha kine ki thain ki mat na ka daw jong ka jingbym biang ka surok, ong ka kyrwoh na ka Seng Kynthei bad Jakhong V.O, Jakhong Village, Mairang.