Mih soh ka jingwan Delhi ki RS? Shen kin sa pynbna paidbah

Shillong, 7 Nohprah:
Ki lad khubor ki la iathuh ba shen ki Rangbah shnong kin pynbna paidbah ia u soh ba mih na ka jingwan Delhi jong ki kaba ki la ioh ban ia kren bad u myntri kam pohing ka sorkar pdeng u Rajnath Singh bad kumjuh ia u myntri khynnah ka sorkar pdeng uba peit ia ka kam pohing u Kiren Rijiju halor ka Village Administration Bill (VAB).
Ha kane ka taiew ba la dep ki Rangbah Shnong ki la leit sha Delhi ban ia kren bad kitei ki heh sorkar halor ka Village Administration Bill (VAB) kaba la sah pongding mynta ha kti ka Ministry of Home Affairs. Shuwa ia kane ki la leit ban ia kynduh ruh ia u Lat ka jylla u V.Shanmu ganathan ban pynbor ia u ban ai jingmynjur noh ia ka VAB ba kan long ain noh namarba dei tang katei ka bill kaba lah ban ai bor biang ia ki sa shisien hadien ba ki la shah sloit bor ha ka Meghalaya High Court. Hadien ba ka jingiakynduh jong ki ia u Lat kam shym la seisoh eiei ki nongialam ka Synjuk Ki Nongsynshar Shnong ka Bri u Hynniewtrep ki la hiar kyrkieh sha Delhi ban ia kynduh ia ki heh sorkar BJP ba kin tuklar noh mar mar ha kaba ia dei bad katei ka mat.
Haduh mynta ym pat shym la ioh jingtip eiei kaei kaba mih na ka jingiakren jong ki, hynrei ki lad khubor ki la ong ba ki la rai ba kin pynbna paidbah ia katei ka jingiakren jong ki ha kaba ym pat shym la lah ban pynthikna la ka jingpynbna paidbah jong ki kan dei da ka jingialang paidbah ne lyngba ki lad pathai khubor. La iathuh ruh ba katto katne ngut napdeng kitei ki nongialam ki Rangbah Shnong kiba la leit Delhi mynta ki la don ha nongbah Shillong hynrei kim pat lah ban ong eiei halor katei ka phang namarba ki don sa kiwei pat kiba dang don mynta ha shiteng lynti.
Lah ban kdew ba kham mynshuwa ki Rangbah Shnong ki la ai por shibnai ia ka sorkar jylla ba kan leh eiei bad tuklar bad ba pynthikna ba ka VAB ka dei ba long aiñ noh, katei ka shibnai jong ki ka la kut naduh ka 5 tarik u nohprah hynrei ka sorkar kam shym lalah ban leh eiei halor ka VAB kumta ki la hiar noh dalade hi sha Delhi bad shen kin sa pynbna ia u soh uba mih na ka jingwan Delhi.