Mih shakhmat, ban pyn shisha ia ki jingkynnoh ba khlem nongrim, ong u heh NPYF ia ki Bengalee

Shillong: U Working President ka National People Youth Front, u bah Nicky Nongkhlaw, mynta ka sngi u la kyntu ia ki jaitbynriew Bengali kiba sah ha ka jylla Meghalaya ba kin wan shakhmat ban pynpaw ia ka jingkynnoh kaba khlem nongrim jong ki 3 ngut ki briew kiba la leit ban ujor sha u Lat ka jylla halor ka jingshah leh bein jong ki jaitbynriew Bangali ha kane ka jylla.

U Bah Nicky Nongkhlaw, u la ong ba ki paid riewngeit Hindu kiba shong ba sah ha ka jylla ki dei ban mih sha khmat ban kren ia ka jingshisha ban pynpaw pyrthei pyrshah ia kane ka jingkynnoh ka ba khlem nongrim jong kine ki 3 ngut ki briew bad lehse kane ka jingkynnoh ka dei tang ka buit poh jongno re jong no ban myntoi ha ka sain pyrthei bad ban wanrah ia ka jingiapher jaitbynriew ha ka jylla baroh kawei .

U la ong ruh ba kumba la ju sakhi ba kiba bun na ki paid riewngeit Hindu kiba dei ki jaitbynriew Bengali baroh shikatta ki im suk im sain bad ki trei ki ktah laitluid ha ka jylla, hynrei shu kyndit kynsan la mih kynsan kata ka jingkynnoh pyrshah ia ki trai Muluk lyngba ka jingkynshoit jong kita ki 3 ngut kiba pyrshang ban pyn klang ia ka ding jong ka jingia sngewpher jaitbynriew ha kum kane ka por lehniam.