Mih sa u kyrtong shimet na Langrin Constituency

Da u Bah Philip Marwein
Shillong, 3 Rymphang:
U Bah Mighter Mar wein, na ka shnong Nong jri, un ïa-aireng kum u kyrtong shimet na 26-Langrin MDC constituency, jong ka South West Khasi Hills District. Ia kane uBah Mighter u la ïathuh ha une u nongai khubor Myn-Sngi Sait jaiñ. U Bah Mighter u la long teng u nonghikai skul bad hadien kata u la trei noh ïa ka kam khaïi dewïong sha Bangladesh kum kiwei kiwei ki nongshalan dewïong. U la long u nongtrei bashitrhem ha ki kam shnong Nongjri kum u samla bad u la long uwei na ki nongïalam jong ka seng samla ha kane ka shnong. U la don bynta ruh ha ki kam ban rat ïa ki jingsniew ha ka thaiñ. Ha ka jingpule u la pyndep ïa ka klas ba-khat-ar. Ha ka kam shalan dewïong, u la long u secretary jong ka MMOEA, ka seng khaïi dewïong sha Bangladesh
U la rai ban ïakhun ilekshon namarba ka thaiñ Borsohra, Nongjri-NOnghyllam-Moheskola-Kulang bad kiwei ki thaiñ border bad ka Langrin constituency barohkawei, ki dei ki jaka ba shah kyntait tam jong ka jylla bad u thmu ban ai ka jingshakri kaba kham bha ban kiwei ki MDC kiba la dep long myshuwa.