Mih sa ki khynnah skul ban shna surok ha Nongjri

Nongstoiñ, 07 Jylliew:
Ki khynnah skul jong ka St. Thomas Sec School, Nongjri, mynta ka sngi ki la iamih paidbah kynthup lang ia ki paidbah nongshong shnong ka thain na ka bynta ban ia maramot hi noh da lade ia ka surok tang ban ioh iaid lynti ban leit sha skul, namar ba katei ka surok kala sniew shaba palat pud kaba la wanrah ruh ia ka jingthut ym tang ha ka leit ka wan jong ki kali, hynrei wat ha ba iaid da ka kjat ruh kala long ka jingthut kaba khraw.
Katei ka dei ka surok Nongjri-Borkhe bad ka bynta kaba la sniew palat kadei ha kawei ka bynta jong ka surok PMGSY kaba jngai kumba 1 KM eiei.
Haba iakren bad u MDC ka thain u bah Morning Mawsor, u la ong ba kum u MDC, hadien ba u la iohi bad lap ruh ia katei ka jingeh ba ki paidbah ka thain Nongjri ki la mad, u la pyrshang ruh ban leit ia kynduh ia u Executive Engineer ka tnad PWD Nongstoiñ Division ban iakren halor katei ka bynta, hynrei U EE u la bthah ia u MDC ba un leit ban iakren bad ki bor ba dei peit jong ka PMGSY, namar ba katei ka bynta jong ka surok kaba la sniew palat kam hap shuh ha ka jingpeit jong ka tnad PWD.
Hynrei na ka liang jong u EE PWD u la iathuh ruh ba ha kaba iadei pat bad ki bynta jong ka PWD, kiba la sniew na ka liang jong u tei u Engineer un sa shim khia ban phah ia ka jingmaramot khnang ba kan nym don ka jingthut ha ka leit ka wan bad u EE u la ong ruh ba ka tnad PWD kan sa phah ia ka jingkhein, na katei ka surok kumba 5 Km bad kumjuh ban leh ia ki hume pipe bad ki nala.