Nongpoh, 22 Lber: Ki nongialam ka Raid Nongkharai bad kaba hap hapoh ka Hima Khat-ar Lyngdoh, Elaka Nongpoh ha Ri Bhoi, mynta ka sngi ki la pynlong ia ka Dorbar Pyllun ba 14 jong katei ka Raid, ha kaba lyngba katei ka Dorbar Pyllun, baroh ki nongialam shnong kiba hap hapoh katei ka Raid, ki la wan ban iashimbynta ha ka jingialang kaba ki la pynlong ha shnong Jyntru.
Lyngba jong katei ka Dorbar Pyllun ba shisien shisnem, la sakhi da ka jingdon u Bah Moses Syngkli, Lyngdoh ka Raid Nongkharai, nangta ki Longsan ki Masan, ki Rangbah Shnong lem bad ki nongïalam Shnong na ki 15 tylli ki Shnong ba hap hapoh ka Raid Nongkharai bad lyngba katei ka Dorbar, ki la ioh ban iakren halor shibun ki mat kiba iadei bad ka jinglong jingman hapoh ka Raid bad khamtam eh, na ka bynta ban wanrah ia ka jingiaieid iajan hapdeng ki khun ki hajar jong ka Raid.
Haba kren sha ki lad pathaikhubor, u Bah Moses Syngkli, u la ong ba ka jingthmu jong ka Raid ba kan pynlong ia kaba kum katei ka Dorbar manla ka snem, ka long ba iatai iathir hapdeng ki nongialam Raid bad nongïalam Shnong, halor shibun ki mat kiba dei shaphang ka bha ka miat hapoh ka Raid.
Shuh shuh, u la ong ruh ba lyngba katei ka Dorbar, ki la ioh ruh ban iakren ba kumno ba kin pynneh ïa ki riti ki dustur hapoh ka Raid bad kumjuh ruh ban wan rah ïa ka shongsuk shongsain, nangta ka jingiakren halor ka kam die ia ki jaka puta sha ki briew nabar.
Haba iadei bad ka rukom die jaka, ka la don ka jingiakren hapdeng ki nongialam Raid bad nongialam shnong, ba haba don kino kino kiba kwah die ia ki jaka puta, nyngkong ki dei ban tyrwa shwa sha ki nongshong shnong hapoh ka Raid bad lada ym don kiba mon ne ym lah thied, hangta ki sa lah ban die sha kiwei pat ki briew na shabar ka Raid, namar da kaba leh kumta kan pynneh pynsah ia ka khyndew ka shyiap bad ia ki riti dustur jong ka Raid.
Lyngba katei ka Dorbar, ki nongialam Raid bad nongialam shnong, ki la shim ia ka rai ban pynneh pynsah ia ki khlaw ki btap bad ruh ia baroh kiba don ha ka mei mariang, ba iada bad khanglad na ka jingpyniap dusmon ïa ki mrad ki mreng bad ruh kaba pyniap ia ki kynja ba-im kiba don ha ki wah bapher bapher.
Phi don ban ong eiei?