Mih ryntih ka dorbar shnong Mawlai Syllaikariah, ban thep vote

Shillong:Ka dorbar shnong Mawlai Syllaikariah ka la mih ryntih ban shim bynta ha ka jingleit thep vote mynta ka sngi Thohdieng, hadien ba ki nongialam shnong ki la weng noh ia ka rai ban nym ïashim bynta.
Lah ban kdew ba ka dorbar shnong Mawlai Syllaikariah kham hashwa ka la shim ia ka rai ban Boycott ia ka election MP namar ka jingmynthi ki bor ba dei khmih ban maramot ia ka surok shnong kaba la shu ieh la 2 snem.

Na ka liang ki nongialam shnong ki la pynpaw ba hadien ka jingpynbna ia ka rai ban nym ïashim bynta ha ka election, ki bor ba dei khmih ki la bthah ia u kontraktor ban pyndep noh ia ka surok kaba la shu ieh khongreng haduh ba kan da dep, bad hadien ba la iohi ia kane ka jingshim khia na ka liang ka dorbar shnong ka la kyntu ia ki nongshong shnong ban mih shakhmat ban pyndep ia ka kam ha ban jied ia ki nongmihkhmat.