|
Shillong: “Ban shu thung tang da ki dieng khlem ka jingkitkhia ka long ka jingpynsyrwa ïa ka pisa paidbah,” la ong u samla Joel Blah Kyndiah ha ka jingïakren bad katto katne ngut ki nongpathai khubor ka Nongbah.
Kane ka long ban pynbna ba ma u bad ka kynhun kin pynlong ïa ka Awareness Campaign ha ka 24 tarik mynta u bnai Jymmang 2019, khnang ban phriang ïa ka khubor jong ka jing kylla ka mariang.
Hynriew ngut ki khynnah samla ka nongbah ki la mih pyrthei ban ïada ïa ka mei mariang da kaba thmu ban leit buh dorkhas ha ka sorkar jylla ryngkat ki mat jingdawa ba kadei ban wad ki lad ki lynti kiba neh skhem khnang ban pynneh pynsah ïa ka mariang.
Kane ka long shi bynta jong ka jingïasnoh kti ka jong ki bad ka kynhun Fridays for Future, ka seng jong ki khynnah pule skul ha satlak ka pyrthei kiba la rai ban pep skul ha ka sngi Thohdieng bad leit ïa shim bynta ha ka jingïakhih ban dawa ïa ka jingshim khia ban ïada ïa ka mariang ïa kaba la tip kum ka Climate Change.
Ïa kane ka rally yn sdang ha ka por 12:30 nohphai sngi na Don Bosco Square, bad ïaid lyngba ka Jacob’s Ladder bad yn pynsangeh ha phyllaw jong U Soso Tham Auditorium ha kaba kin leit ai ïa ka dorkhas bad 6 tylli ki mat jingdawa ha u Myntri Rangbah ka Jylla u Conrad K Sangma. Ka kynhun jong kine ki khynnah ba dang pule skul ka don mynta kumba 80 ngut ei ei kiba ïa snoh kti.
“Kawei na ki mat jingdawa ka long ban pynbna noh ïa ka Climate Emergency ha jylla, kumba la leh kiwei ki ri,” la ong u samla Joel Blah Kyndiah.
Ryngkat bad u la ïa don lang ruh u samla Bryan Walter Warjri, Justin Jeremiah Ryngad, Pratham Gurung, bad i Anthea Jana. Iwei pat i dkhot iba kyrteng Da-e Mitre Pariat im shym la lah ban poi sha kane ka jingïakynduh bad ki lad pathai khubor.
U samla Joel Blah Kyndiah u la ong ba kiwei ki mat ki kynthup ïa ka jingdawa ban pynduna ka dheng kali da kaba pynïaid da ki kalai kamai lane ka Public Transport.
U samla Joel Blah Kyndiah u la ong, “Ka sorkar ka dei ruh ban shimkhia ba ka jingpynbna ïa ka Climate Emergency ka dei ban long kaba pura, lym kumta kan ym myntoi ei ei ruh em,” bad u la ban jur “Dei ma ngi ki khun samla ki ban mad ïa ka jingeh lashai hadien ha bud namar ki nongïalam kiba mynta kin ym ïohi shuh.”
|
Phi don ban ong eiei?