“Mih paidbah sha ka rali la sngi thohdieng” ong ka KSU, FKJGP

Shillong, 14 Nailar:
“Para ri paradoh parasnam, ngi ki Seng bhalang FKJGP bad KSU ka shnong Mawlai ngi iawer paidbah iaphi ki samla, ki rangbah ki longkmie bad longkpa ba phin iawan ban iadon ryngkat lem bad iasnoh ktilang sha ka jingialang paidbah bad ka rally ba la pynbeit da ki 10 tylli ki sengbhalang ha ka 16 tarik Nailar, 2013 ha ka por 11:00 baje mynstep, na ka bynta ban ka jingdawa ban pyntreikam noh mardor ia ka Inner Line Permit ka ain ban iada ia ka jaidbynriew rit paid ka jong ngi na ka jing wan rung kyrthep ki briew kiba ba nabar ne ki poi wir shi sngi”, la ong kine ki ar tylli ki seng na Mawlai ha ka kyrwoh ba la pynlait mynta ka sngi.
Ha ka jingpyllait khubor ba la pyllait ki President kine ki seng, la kyntu ia ki Dorbar Shnong jong ka Mawlai baroh ki samla pule jong ki Kolej bapher bapher, ki seng nongniah bad trai taksi bapher bapher jong ka Mawlai bad kumjuh ruh ia ki seng nongniah bad trai Auto Association ba kin ia mih ryntih lang ban poi ha ka por 9:30 mynstep ha Lad Motsyiar ha ophis treikam FKJGP na ka bynta ka jingialang ha ka 16 tariak Nailar, 2013 ha ka por 11:00 mynstep.
Kane ka jingialang kan long ban dawa na ka sorkar ban pyntreikam noh ia ka Inner Line Permit (ILP) ka ban long ka stieh iada na ka jingwan tuid ki briew nabar sha kane ka jylla, la ka kyrwoh ba la pynlait da u Bah Marbud Dkhar bad u Bah Donboklang Kharlyngdoh ki nongialam jong kine ki ar tylli ki seng jong ka Mawlai circle.
Ki sengbhalang bapher, ki la pynbeit, ban pynlong ia ka jingialang paidbah ha Motphran, ha ka por 10baje mynstep, na ka bynta ban pynbor ia ka sorkar ban pyntreikam noh ia ka ain Inner Line Permit, ha kaba ki la pynkhreh ruh ban leit tur sha Secreteriat, hadien jong katei ka jingialang paidbah.