Mih paidbah ki nongialam BJP na East Garo Hills

Shillong: Ki nongtrei jong ka seng Bharatiya Janata Party (BJP), na East Garo Hills, ki la mih paidbah na katei ka seng myn hynnin ka sngi bad ka daw, ka long namar ba ka la slem palat ka jing pynbna tiket ban ialeh MP na Tura Constituency.
Kito kiba la mih noh ki long U President ka Mandal Committee, U Kullen Sangma, nangta ka President ka Mahila Morcha, ka Serola Sangma bad U President ka Yuva Morcha, U Charles Sangma.
Kitei ki lai ngut ki nongialam, ki la aiti ia ki shithi iehnoh kam jongu, sha U President jong ka East Garo hills District mynta ka sngi. Kitei ki nong ialam, ki pynpaw ruh ia ka jingsngew pyrshah ba ka seng BJP, ka iai kyrshan ia ka seng kaba bamsap bad kaba shim kabu, ka seng National Peoples’ Party ha ka Jylla.
Kitei ki lai ngut ki nongialam, ki la pynduh noh ruh ia ki komiti ba ki ialam ma ki bad nangta ki la risain ruh lem bad shibun kiwei pat ki dkhot jong ka seng kiba don ha ki shnong lem bad ki kam ba ki bat.
Kat haduh mynta kim pat pynbna satia, la kin leit pyniasoh ialade sha kaei ka seng sain pyrthei lane ba kin kyrshan ia uno u kandidet ha kane ka kynti kaba mynta.