Mih paidbah ki nong shong iew ban pynkhuid ia ka Iew Umsning

Shillong,21 Nohprah:
Kum ka dak ka jingpdiang sngewbha ia ka Krismas ki paidbah nongshong iew ka Umsning mynta ka sngi ki la mih paidbah ban pynkhuid ia ki kyndong kynshrot jong katei ka iew. Ha katei ka jing pynkhuid iew baroh ki nongshong iew ki la wan ban shim bynta shitrhem ban pynkhuid ia katei ka iew. Shuwa ban sdang ia ka jingpynkhuid iew ka la don ka jingialang lyngkot hapdeng ki nongshong iew bad ki bor jong ka Hima Mylliem bad hadien kata la sdang ia ka jingpynkhuid da ka jinglamkhmat jong ar ngut ki myntri ka hima Mylliem u myntri K.Langstieh bad u myntri M.B Kharlukhi hadien kata la wan ban ia snohkti lang ki paidbah ba bun.
Ha katei ka jingialang, ka la don ka jingpyni jingmut na ki paidbah sha ki bor ka hima Mylliem halor kumno ban weng ia ka jingkhapngiah katei ka iew namar ka jingjyllei ki nongdie madan bad halor kane u myntri Langstieh u la ong ba shen un sa pynbeit ia katei ka kam ha ryngkat ka jingiatreilang bad ka Town Dorbar jong ka Umsning.