Mih paidbah ki 18 shnong, ka thaiñ Langdongdai ban maramot surok

Nongstoiñ:Ka Synjuk ki nongsynshar shnong Nongtrai Sepsngi kaba kynthup ïa ki 18 tylli ki shnong kiba hap hapoh ka Rambrai Jyrngam Constituency, mynta ka sngi ka 28 tarik u Risaw ka la lum ïa ki khun shnong khun thaw na ka bynta ban ïa mih paidbah ban maramot ïa ka surok na Mawkyllon sha Langdongdai kaba la pynsyllang ïa ka leit ka wan jong ki paidbah namar ka jingjot rathai katei ka surok.

Ban poi sha katei ka thaiñ hap ban iaid lyngba ka surok bah Riangdo-Athiabari sha Riangsieh bad na Riangsieh lyngba ka surok PMGSY haduh Nongjri bad Mawsmai katba ka surok na Mawkyllon sha Langdongdai kaba don kumba 6 KM kam pat dei satia ka surok bala shna da ka tnad PWD hynrei kadei ka surok kaba la shna hi da ki paidbah nongshong shnong lyngba ka skhim MGNREGA ne ka 100 sngi.

Kaba la pynlong ia ka Synjuk ki nongsynshar shnong ka thaiñ Nongtrai Sepsngi kadei hadien ba kila mad ïa ka sohsat ha ka ïaid ka ïeng ka kit ka bah bad khamtam ha ka pang ka shitom namar katei ka surok kala sniew palat pud kat haduh ba ki truck, ki four wheel pickup bad ki thuk thuk kiba ju iaid man ka por ki la shitom ban iaid na katei ka surok.
U bah B. Riangtem President ka Ka Synjuk ki nongsynshar shnong Nongtrai Sepsngi haba iakren sha ki lad pathai khubor u la ong ba ha ka jingshisha na Langdongdai haduh ban da iakynduh ia ka surok PMGSY kam da jngai lada bha ka surok namar ka don tang kumba 6 KM, hynrei namar ka jingsniew ka surok ki nongpang bun kiba la khlad noh ha shiteng lynti bad kumjuh ki longkmie ba ar met ruh ki kha khyllung ha shiteng lynti khlem lap poi shuh shaduh CHC Riangdo.

Shuh shuh u la ong ruh ba na ka liang jong ki nongsynshar shnong katei ka thain ki la leit ruh ban iakynduh ia u DC barim ka West Khasi Hills u bah T. Lyngwa n aka bynta ban kyrpad ban iarap ban pynrung noh sha ka PWD ia katei ka surok ha kaba na ka liang jong u DC ruh u la kular ban thaw lad na ka bynta katei ka surok ha kaba ka la don ruh ka jingiapynbeit bad ki trai khyndew.

Ym tang kata u la ong ruh ba na ka liang jong ka Synjuk, ka la leit mih bad u MLA ka Rambrai Jyrngam Constituncy ban iakren halor katei ka surok, hynrei na ka liang jong u MLA u la ong ba ym pat lah bad kumta kim banse ban hap ianoh synniang hi noh da ki paidbah nongshong shnong da ka bor met ha ryngkat ka bor pisa ban shna ia katei ka surok.
Na ka liang jong ka Synjuk ka ai khublei ruh ia u MDC ka Mawshynrut Constituency u ba la ia noh synniang lem sha ka Synjuk bad ha kajuh ka por ka kyntu ia ka sorkar Jylla ba kan phai khmat lem noh sha katei ka thaiñ bad ban pynïoh noh ia ki surok kiba bha la kumno kumno ha shwa ban kut ka 5 snem jong ka sorkar MDA.