Mih noh u MDC ka Mawlai, na ka seng UDP

Shillong: Ka kam seng saiñ pyrthei ha ka jylla ka la nang khih phaloh katba dang mih ki sngi namar ka elekshon shapoh ka iingdorbar thawaiñ ka jylla ka la nang jan ha kaba u MDC ka seng United Democratic Party(UDP) na Mawlai Constituency u Bah Teiborlang Pathaw u la phah da ka jingthoh sha u President jong ka UDP, u Bah Metbah Lyngdoh ha ka 21 tarik u bnai Lber 2022 ban pyntip ba un mih na katei ka seng. U Bah Teiborlang Pathaw u la pynpaw ba ka jingmih jong u na katei ka seng ka dei namar ba watla ka la don ka jingpynbeit  ban pynkhlaiñ ia ka seng hynrei ki nongialam jong ka seng na Mawlai Circle kim don satia ia kata ka mon ban leh ia kata bad ka ju don ka jingpyrshang ban pynbeit hynrei kita ki khlem poi satia shano shano ruh.

U Bah Teibor Pathaw u la pynpaw ruh ba ha por ba la thaw ia ka Mawlai Circle, ki nongialam ki khlem pyntip eiei satia ia u bad sa kawei pat ka daw ba u la pynpaw ka dei namar ka jingleh lyndet bad ka jingleh klet jong ka seng da ki katto katne ki nongialam kiba la shim rai hi dalade ban pynbna ia ka kyrteng jong u kyrtong ka seng u ban ia aireng ha ka elekshon ka ban sa long shen ha u snem 2023 bad u la ong ba katei ka jingpynbna ia ka kyrteng jong u Bah Process T Sawkmie ban long kum u kyrtong jong ka seng la leh hi da ki katto katne ki nongialam jong ka UDP hapoh ka Circle ym ba lah leh da ki nongialam jong ka seng kmie. Shuh shuh na ka liang u Bah Teibor u la kyntait ban iathuh ia ka seng ba un leit pyniasnoh hynrei u la shu ong beit ba un lum shwa ia ki nongialam bad ki nongkyrshan jong u ha ka jingialang ka ban sa long ha ka sngi ba ar ban iakren bha halor kata bad nangta un sa shim ia ka rai hadien kata. Hynrei katkum ki khubor kiba la her kylleng sawdong la sngewthuh shai ba u Bah Teibor, u lah ban leit pyniasnoh noh ialade bad ka seng National People’s Party(NPP).

Kum ban shu pynkynmaw u Bah Teibor Pathaw u la jop ia ka elekshon MDC na Mawlai Constituency ha u snem 2019 kum u kyrtong khlem seng hynrei tang hadien katto katne por ba u la jop kum u MDC u la leit pyniasnoh noh ialade sha ka seng UDP bad u la ioh ban bat ruh ia ka shuki Executive Member(EM) ha ka Executive Committee ba la ialam da ka UDP hapoh Khasi Hills Autonomous District Council(KHADC).