Mih noh ka UDP na ka kynhun NEDA jong ka seng BJP

Shillong: Ka UDP, ka la mih noh ialade na ka kynhun ia synrop bad ka BJP, lane kaba la tip kum ka North East Democratic Alliance (NEDA), na ka daw jong ka jingthmu jong ka sorkar BJP, ban pyntrei kam ia ka Citizenship Amendment Bill, 2019 (CAB) ha ka dorbar Parliament.

Ka NEDA, ka dei kaba la seng ha u snem 2016, ha kaba ka BJP, ka la lum la lang ia baroh ki seng trai ri, ba kin ia synrop lang ha katei ka shatri, ban iakhun pyrshah ia ka seng Congress.

Katei ka khubor, ka la paw ha ki katto katne ki news portal mynta ka sngi, ha kaba ki la shim ia ka jingkren jong U Hayithung Bill Lotha, uba dei uwei na ki nongialam ba rim ka BJP, ha kaba u iathuh ba ka UDP, ka la mih noh, na ka kynhun NEDA, namar ba ka BJP, ka la kren shai ba kan wan rah biang ia ka ain CAB, lada kan wan ha ka bor ha u snem 2019.

Na ka liang U Bah Allantry F Dkhar, uwei na ki nongialam jong ka seng UDP, ula kynthoh ba ha ka jingialang jong baroh ki seng trai ri, kaba la long ha Guwahati dang shen, ki la rai ba kin weng noh ia ka jing ia treilang jongki bad ka seng BJP, namar katei ka ain ban ailad buhai shnong ia ki poiwir.