Shillong: Hadien arphew ar sngi kynthih, ka Amita Sangma, ka la mih noh mynta ka sngi, na NEIGHRIMS bad mynta ka sngi, la pyni ia ka dur jong ka jingmynsaw kaba jur ha ka met jongka, na ka daw jong ka jingshah shoh jongka, ha ka 8tarik Naiwieng 2018. Ha ka dur, la pyni ia ka shympriah kti jongka, kaba la shah ot bad nangta sa ka jingmynsaw kaba jur ha ka khlieh jongka. Katei ka jingmynsaw, ka long kaba paw tang shabar, khlem da ia kren shuh ia ka met jongka baroh shi rynieng.
Ha ka jingpynmih khubor mynta ka sngi, ka Amita Sangma, ka ai khublei sngewnguh ia ki doktor bad ki nongtrei jong ka NEIGHRIMS Hospital, nangta ki doktor bad ki nongtrei ka Ialong Civil Hospital Jowai, ki nongtrei ka 108, nangta ia ka sorkar Jylla, ka tnat ka koit ka khiah jong ka sorkar India, ki pulit jong ka Meghalaya, ki kynhun balang, ki nongthoh khubor kiba la iarap ia ka, ba kan lait im ha katei ka sngi ba sniew bok jong ka 8tarik Naiwieng 2018.
Ka Amita Sangma, ka la sah ha katei ka Hospital, la 22 sngi kynthih.
