Mih madan ka SBYWA ban maramot surok

Shillong: Ki dkhot jong ka Southern Border Youth Welfare Association SBWYA bad ki dkhot jong ka Jaińtia Youth Welfare South Eastern Border hapoh ka jingialam u President ka SBYWA u samla Skhembor Shadap bad u Secretary central body jong ka JYWSEB u ma chaphrang Pajuh ki la maramot hi ia u surok uba la sniew palat naduh shnong Wah Lama haduh shnong Nator kaba hap hapoh East Jaintia Hills District.

Namar ba ka sorkar ka ieh khunswet ia kane ka thaiñ ba sha khappud kine ki ar seng ki la shim ia kane ka sienjam ban maramot hi ia kane ka surok hadien ba ki paid nongshong shnong jong kane ka thañ ki la ud la nam bad ki shem shitom haduh katta katta, khamtam ha ka por slap bad haba don ba pang ba shitom kim lah ban pynpoi sha ki hospital ha ka por kaba biang.

Haba ia kren bad u secretary jong ka JYWSEB u ma Chaphrang Pajuh, u la pynpaw halor ka jingeh jong ki nongshong shnong kane ka thain da ka ba ong ruh ba u MLA, kane ka thaiñ ba ha ka por eleksion u la kular ia ki paidbah ban un shna ia kane ka surok, hynrei hadien ka eleksion kam shem la urlong kumba u la kular hynrei ka long tang ka jingpynbiej paidbah jong kine ki thain.