Ki la mih shibun ki kyrteng ha kine ki sngi, kiba shalan droks ia U Sushant Singh Rajput bad kitei ki kynthup ia ka Sara Ali Khan, ka Shraddha Kapoor, ka Rakul Preet Singh nalor kiwei pat.
Mynta ka sngi, ka la mih sa ka kyrteng jong ka Deepika Padukone, ha kaba la kynnoh ba ka don ka jing iakren jongka shaphang u droks bad kito kiba shalan droks sha U Sushant Singh Rajput.
Mynta, ka la mih sa kawei ka kyrteng bad katei ka dei ka jong ka Dia Mirza, ha kaba la kynnoh ba ka Dia Mirza ruh, ka donkti ha katei ka kam shalan droks ia U Sushant.
Ka Dia Mirza, ka la pynshai mynta ka sngi, da kaba ong “Nga kwah ban kren shai hangne, ba ngam pat ju pyndonkam droks ha ka jingim jongnga bad kane ka dei tang ka jingleh ban pynbudnam ia nga”. “Kane ka jingleh, ka long ban pynjot ia ka kyrdan jongnga, kaba nga la trei shitom ba ngan nang kiew shajrong ha kine ki sngi”.
Haduh mynta, ki la don 18 ngut kiba la shah kem halor ka jing shalan droks sha U Sushant bad kitei ki kynthup ia ka Rhea Chakraborty, u hynmen jongka, U Showik, nangta u nongpeit ia ka iing U Sushant, U Samuel Miranda bad nangta u nongshet jong U Sushant, U Dipesh Sawant.
Kiwei pat kiba dang don ha ka jingbuddien ka NCB, ki long ka Deepika Padukone, ka Sara Ali Khan, ka Rakul Preet Singh, ka Shraddha Kapoor bad nangta ka nong suh jain ba pawnam, ka Simone Khambatta.
Phi don ban ong eiei?