Nongpoh, 30 Risaw:
Da kaba sngewkhia halor ka jingsniew ka surok naduh Umsawnongbri sha Umklai ban mih sha Nongpoh, kaba la wan rah jingeh shi kat dei eh ia ki nongleit nongwan, kumta na ka liang ki trai kali bad ki nongniah kali, na ka Umsawnongbri Circle, da kawei ka jingmut ki la mih paidbah ban maramot hi ia ki katno katne bynta ba la sniew palat.
Kane ka dei ka sien ba ar ba ki trai bad nongniah kali jong katei ka thain ki la mih paidbah ban maramot hi ia ki bynta ba la sniew palat, namar ba bun na ki bynta ha katei ka surok ki la jot la pra.
Haba iakren bad uwei na ki nongshong shnong ka Umsawnongbri, u la ong ba kim banse ban maramot hi hi ia kane ka surok, namar ki nongmihkhmat kiba la jied ba kin peit ia ka khia ka shon ki paidbah kim treh ban shim ia ka jingkitkhlieh, u la bynrap ruh da kaba ong “Ngi la khmih lynti ban ioh ka jingiarap na ki nongmihkhmat na ka bynta ban maramot ia kane ka surok hadien ba la kut ka Election, hynrei sngewsih ban ong ba kat haduh mynta ym pat leh ei ei”, u la ong.
Kumta u la kyntu ia ka sorkar bad nongmihkhmat ba kin phai khmat lem sha katei ka jaka da kaba pynmang lem ia ki skim bad jingiarap na ka bynta ban kyntiew ia katei ka thain, khnag ban iaryngkat kumba long lem kiwei pat ki shnong ha ka jylla, u la bynrap.
Phi don ban ong eiei?