Mih ki sengbhalang ban pyrshah pata kyiad ha tamasa Bhoirymbong

Nongpoh, 23 Risaw:
Ki sengbhalang bapher bapher na ka them Ri Bhoi District kiba kynthup ia ka RBYF, HYC, CORP, HNYF, RBSU, HNM lem bad ka Senglongkmie na Bhoir ymbong ryngkat ki plakad ki la mih paidbah ban pyn paw ia ka jingpyrshah ia ka jingbuh pata kyaid ha ka tamasa iarwai iasiaw ha madan Kurkalang ha Bhoirymbong hynne ka sngi. Kine ki sengbhalang ki la pynjur ia bor district bad ka sorkar jylla kaba la ai bor sha ki nongpyniaid ban buh pata kyiad ( BAR) ha katei ka tamasa ba pynlong da ka Bacardi NH7 Weekender.
U Vice presisent ka RBYF u Bah L.K Sawkmie u la ong ba ki sengbhalang kim pyrshah ia ka jingwan ban pynlong ka kane ka tamasa hynrei ki pyrshah jur ia ka jingbuh ia ka jaka dih sngewbha ha katei ka tamasa. “Kumno ka sorkar jylla bad ka bor synshar district ka ai bor ban buh pata kyaid ha ka tamasa iatem iaput bad ngi kum ki sengbhalang ngi pynrem jur ia kane “, la ong ki nongialam sengbhalang.
Ki la pynrem jur ia ka Deputy Commissioner ka Ri Bhoi District ka Pooja Pandey kaba ai bor ban buh pata kyaid bad ka paw ba ka la pynkheiñ hi ia ka hukum jong ka 144Cr Pc.Hynrei ha kajuh ka por, kine ki sengbhalang ki la kyrpad ia ki paidbah ba wan ban ia shimbynta ha katei ka tamasa da ka akor ka burom ym da ka jingpynjah burom.Ia kane ka jingpyrshah la ialam da ki nongialam sengbhalang ba kynthup ia u Bah Bipul Thangkhiew, president ka RBYF, L.K Sawkmie, vice president ka RBYF, Bah Amberlight Masharing, president HYC, NKHD, Bah A. Jyrwa, Secretary ka HNYF, Northern zone lem bad kiwei kiwei ki nongaialam jong kiwei ki sengbhalang ha ryngkat bad ki longkmie na Bhoirymbong.