Mih ki samla ka North East Adventist, ban ai snam sngewbha

Jowai:Ki samla ka North East Adventist University, Khliehtyrshi, West Jaintia HIlls District, mynta ka sngi ki la mih shakhmat ban ai snam sngewbha ha ka por ba katei ka skul bah ka la pynlong ruh ia ka jingai jinghikai shaphang ka jingdonkam ban ai sngewbha ia ka snam sha kito ki briew kiba donkam bad khamtam eh sha ki jaka kynshew snam.

Ha kane ka jingai sngewbha ia ka snam la lam khmat da ka Dr. P Shylla kaba dei peit ia ka Blood Bank ka Jowai Civil Hospital, Ialong ha ryngkat ka kynhun jong ka.

Haduh 39 ngut ki ba la ai kyrteng ban ai sngewbha ia ka snam jong ki hynrei napdeng katei ka thup, 19 ngut ki la ai sngewbha ia ka snam jong ki mynta ka sngi bad napdeng kitei ki 19 ngut, lai ngut ki dei ki kynthei.
Haba kren ha ka jingialang ban ioh jingtip halor ka jingai snam, ka Dr. Shylla ka la ong ba ka don ka jingmyntoi shibun ia ki nongai snam khamtam ha kaba iadei bad ka koit ka khiah jong ki. Ka la ong ruh ba ka jingaisnam kadei ka jingiarap kaba khraw tam ia ki para briew haba ki donkam ban ioh ia ka snam haba mynsaw ne haba pang.

Ka la ai ka jingiaroh ia ka bor pyniaid ka NEAU naduh u Dr. P. Bhaggien, Vice Chancellor, ki nongtrei bad ki samla pule halor kane ka jinglong la kloi jong ki ban wan shaphang ban pynlong ia kane ka jingai sngewbha ia ka snam jong ki.