Mih ki paidbah ka Elaka Sutnga, ban pyrshah ia ki karkhana Coke

Jowai: Ki paidbah ka Elaka Sutnga na kylleng ki shnong ki la mih paidbah ban ia shim bynta ha ka peace rally na ka bynta ban pyrshah ia ki karkhana thang dewiong (Coke Factories) kiba don hapoh katei ka Elaka.

Kane ka jingiaiaid paidbah ka la sdang naduh Shi-Kilo bad shaduh sha phyllaw ka ophis treikam u Deputy Commissioner ka East Jaintia Hills. Ki paidbah ki la rah ia ki banner bad ki placard bad ka jingpyrta ban pynrem ia ka sorkar kaba la ai bor ia kitei ki kharkhana ha katei ka thain.

Ki nongialam jong ka Environment Coordination Commmittee (ECC), Elaka Sutnga ki la ia kynduh ruh ia u DC ban dawa ba dei ban phah sangeh noh ia kitei ki Factory ha katei ka jaka kiba don ha Soo-kilo, Umthe bad Umpleng.
Ki rangbah na katei ka Eaka ki la pynpaw ba ka jingwan kine ki Kharkhana thang Dewiong jin haduh palat 35 tylii ka la wanrah ka jingjakhlia ka lyer bad ka jingsma dewiong kaba lah ban buh ia ki paidbah ha ka jingma na kadaw ka lyer.
“Ngi donkam ia ka lyer kaba khuid bad ia ka um kaba khuid, myntoi aiu ban ioh ia ka spah lada ngi duh noh ia ka jingkoit jingkhiah”, la ong ki katto katne ki jingthoh ha ki placard.

Ha ka jingiakren kitei ki nongialam bad u Deputy Commmissioner ka East Jaintia HIlls, u bah E Kharmalki u la ong ba ka bor hi kadei na ka Meghalaya State Pollution Control Board bad na ka liang jong u um sa phah ia ka jingthoh ban pyntip halor kane ka jingpyrshah jong ki paidbah.
Shuh shuh u DC u la ong ba lashai hi ka sngi un phah ia ki Magistrate bad ki pulit ban leit jurip ia ki Kharkhana Thang Dewiong khamtam kito kiba dang don tang ka CTE. (Concern to establishment katba ia kito kiba la ioh ia ka CTO (Concern to operates) pat yn hap ban bishar la ki bud ryntih ne em ia ki kyndon.
Ha kajuh ka por u DC u la kyntu ruh ia ka bor E;laka bad ia ki bor shnong ban bishar ia ki NOC kiba la ai sha kito ki trai jong kitei ki kharkhana.
U Chairman ka ECC u ma DH Mallang u la iathuh ba kane ka jingpyrshah ia kitei ki kharkhana ka la long hadien ba la iohi ia ka jingjakhlia ka lyer bad ka Um wat ka umslap ruh ka la jakhlia.
Shuh shuh la iathuh ba ki trai jong kitei ki kharkhana ki dei kiba na bar jylla katba ki trai jylla ki ioh da ka percentage kaba 5 haduh 10 percent.