Mih ki paidbah bad ki sengbhalang, ban pyrshah bret niut ha Mynkjai

Jowai:Ka Khasi Students’ Union ha ryngkat ki paidbah na ki 9 tylli ki shnong ha West Jaintia Hills kynthup na ka shnong Moopyut, Moosakhia, Umsalang, Madantyrpait, Skhenpyrsit, Muphlang, Pynthorlangtein, Samanong bad Mustem ki la mih paidbah sha Mynkjai na ka bynta ban ieng pyrshah ban bret niut da ka Jowai Municipal kaba don baroh shi katta ha katei ka jaka.

Da ki spah ngut ki paidbah ki la mih ha ryngkat ka Placard bad ki banner ban pynpaw ia ka jingpyrshah jur jong ki namar ka jingbret niut ha katei ka jaka ka wanrah ka jingsma jingtung bad kaba pynjaboh ruh ia ka mariang.
Na ka liang ka bor District bad bor Sub-Division ka la pyrshang ban pynsngewthuh ia ki paidbah ba kin iai shah hapoh 6 bnai la lah dep ban pynbiang ia ka jaka hynrei na ka liang ki rangbah shnong bad ka KSU ki la pyneh hi triang ban ieng pyrshah beit ia kane ka jingbret niut ha katei ka jaka.

Katei ka kynhun kaba pyrshah ia ka bor District ka la dawa ruh ba dei ban weng noh shisyndon ia ka jingpynjari da ka section 144 CrPC ha katei ka jaka.
Ka hukum kaba la pynmih da u SDO Amlarem Civil Sub-Division hynnin ka sngi ka long ban khang lad ia katei ka jingthmu ban iakhih pyrshah, hynrei katei ka kyndon kam shym la lah satia ban pyntreikam na ka daw ka jingtur jong u paidbah nongshong shnong.