Mih ki nongtrei casual, ka koit ka khiah ban dawa thungkam pura

Nongpoh:Ka kynhun ki nongtrei Casual na kylleng ki jaka sumar kiba don ha Ri Bhoi bad kiba don hapoh ka Shatri kaba la tip kum ka Ri Bhoi Progressive Health Union, hynne ka sngi ki la leit ban pynlong da ka jingiakhih da kaba jai jai bad rah Plakad ha phyllaw ka Nongpoh Civil Hospital, kata na ka bynta ban dawa na ka sorkar ba ka dei ban ithuh noh ia ki kum kita ki nongtrei ba pura ha ka tnat ka koit ka khiah bad ym shuh ban khot ia ki kum kita ki nongtrei bylla sngi ne kum kita ki Casual Worker.

Ka nongrim kaba la pynlong ia kitei ki nongtrei Casual jong ka koit ka khiah ba kin mih shakhmat na ka bynta dawa na ka sorkar ba ka dei ban thungkam pura noh ia ki, ka dei katkum ka Meghalaya Regular Casual Workers Scheme, 1996, kaba la pynpaw shai ba kino kino ki nongtrei Casual kiba la trei palat ia ka 10 snem, dei ban thungkam pura noh ia ki bad ym ban shu khein sah ia ki kum kita ki nongtrei Casual.

Ki nongialam ka Ri Bhoi Progressive Health Workers Union, kiba kynthup ia ka Kong Beril Kshiar, kum ka President, nangta u Bah Khraw Lyngdoh, General Secretary ha ryngkat bad shibun ngut ki dkhot, ki la iamih paidbah ha phyllaw ka Civil Hospital Nongpoh, kata ban pynpaw ia ka jingpyrshah sorkar jong ki, hadien ka jingiai leh mynthi ka sorkar jylla halor ka jingdawa da kitei ki nongtrei Casual.

Ki la don bun ki nongtrei Casual, kiba la pynpaw ba ka sorkar ka la lehbein shaba palat ia ki, ha kaba nalor ba ki ioh duna ka bainong, nalorkata sa ka jingbym ai thikna ia ka bainong bad kaba la buh ia ki nongtrei Casual ha ka khim khait, na ka bynta ban pyndap pynbiang ia ki jingdonkam ha iing ha sem.

Ha katei ka sngi ba iakhih ki nongtrei Casual, ka HNYF Nothern Region lyngba u Bah Marcus Marten, President ha ryngkat kiwei, ki la la ai ka jingkyrshah halor katei ka mat jingiakhih kaba la pynlong da ka Ri Bhoi Progressive Health Casual Workers Union.
U Bah Marcus Marten, u la ong ba katei ka jingiakhih da kitei ki nongtrei Casual, ka dei kaba don nongrim, namar ki dawa ia la ka hok bad ha kajuh ruh ka por, u la pynrem ia ka sorkar jylla bad ka tnad ka koit ka khiah, namar ka jingbym shimkhia halor ka jingeh kaba la kynduh da ki nongtrei Casual.
Ka seng ka ai ruh ia ka jingkyrshan halor ka jingdawa na ka sorkar ba ka sorkar ka dei ban ithuh noh ia ki kum kita ki nongtrei ba pura kaba long katkum ka Meghalaya Regular Casual Workers Scheme, 1996, na bynta jong kito ki nongtrei kiba la shakri palat 10 snem ha ka kam.