Mih ki nongtrei ASHA ban dawa jingsiew na ka sorkar

Shillong, 9 Jymmang:
Ki nongtrei ba ju iarap ha ki kam ai dawai ia ki khyllung bad ki longkmie ba armet, ki Accredited Social Health Activist (ASHA) mynta ka sngi ki la pynlong ïa ka jingïaid paidbah ban dawa na ka sorkar ban ai noh da ka jingsiew ba pura na ka bynta ki kam ba ki trei. La sdang ia ka jingiaid paidbah na Quinton road bad pynkut pat ha ka jaka ïeng kali ka Additional Secretariat, Shillong.
Ha kane ka jingiaid paidbah da ki spah ngut ki nongtrei ASHA na kylleng ki bynta jong ka jylla ki la wan ban ia shim bynta ryngkat ka jingrah ia ki placard bad ka jingpyrta ba ka sorkar kan pynurlong ia ki jingdawa jong ki. Hadien ka jingialang ha katei ka jaka, na ka liang ki nongialam jong
ka Meghalaya ASHA Workers & Felicitator Union bad ka Meghalaya ASHA Workers Union ki la leit ban ïakynduh ia u Chief Secretary ka jylla, u K S Kropha ban ai ia ka dorkhas jong ka jingdawa jong ki.
Haba ïakren bad ki lad pathai khubor, ka president jong ka MAWFU bad ka MAWU, ka Kong Haphilin Pyrtuh ka la iathuh ba ryngkat bad ki nongtrei ASHA ha ka Ri baroh kawei, ki ASHA ha ka jylla ruh ki la pynlong ia ka jingiaid rally ban buh ia ki jingdawa jong ki hakhmat ka ophis u Myntri Rangbahduh ka Ri (PMO).
Ka Kong Haphilin kala pynpaw ba ki ASHA ha ka jylla kiba don palat 6000 ngut kim lah shuh ban shu trei mon sngewbha namar katba nang mih ki sngi ka jingtrei jong ruh ka la nang khia, ka la iathuh ba haduh mynta ki ASHA ki ioh ia ka jingsiew ba T. 1000 shibnai bad kata ruh ki hap ban pynbiang ia ki report man la u bnai, bad la kim lah ban pynbiang pat kim ju ioh satia wat ia ka T. 1000 ruh.
Ka la ong ba ha kiwei ki bynta jong ka Ri, ia ki ASHA la siew da ki sorkar jylla ha ka dor T. 4000 haduh T. 6000 bad dawa ba ha kane ka jylla ruh dei ban siew noh ia ki la kumno kumno ha ka dor T. 3000 shibnai nalor ka bai leit bai wan ba kin kham im bad kin kham lah shuh shuh ban trei ia ka kam, “Lyngba ka jingdon jong ki ASHA ka jingïap jong ki kmie bad ki khyllung ba dang pun ki la duna bha, kumta ka sorkar kadei ban pyrkhat lem na ka bynta ki ASHA ba kin lah ban trei khambha ia ka kam”, ong ka president.
Ka la ïathuh ba na ka liang jong u Chief Secretary um pat shym la ai satia kano kano ka jingkular hynrei u la sngap ia ka jingdawa jong ki bad ong ba un sa khmih bniah ia kane ka jingdawa jong ki. Nalor ka jingdawa ia ka jingsiew ba pura kane ka kynhun jong ki ASHA ka la dawa ruh ba ka sorkar kadei ban ai shuti ia ki ha ki por ba ki dang ioh khun rit, ban pynioh ia ki ka jingsumar ei lyngba ka scheme ESI, ka pension yn da kim lah ban trei shuh bad kiwei kiwei.