Mih ki nongniah kali bad HYC ban maramot ia ka surok ban leit sha Umden

Nongpoh: Namar ba la sniew palat ka surok bad kaba la wanrah jingeh nongniah kali kamai ka thain Umden, ha ryngkat bad ka HYC Umden Circle hynnin ka sngi Saitjain, ki la mih paidbah ban maramot hi ia ki bynta ba la sniew palat ka surok na Umden-Nongpoh.

Halor katei ka kam maramot surok, u Bah Arbing Syiem President ka kynhun ki nongniah kali kamai ka thain Umden bad u Bah Donbok Maiong Vice President ka HYC Umden Circle, ki la pynpaw ba kim banse ban mih hi na ka bynta ban maramot ia katei ka surok, namar ba ka la sniew palat bad kaba la pynsyrtok shikatdei eh ha ka leit ka wan ki paidbah kiba sah ha katei ka thain.

Ka kynhun ki nongniah kali kamai lem bad ki HYC Umden, ki la kyrpad sha ka sorkar ba ka dei ban shimkhia mardor ban pynbha noh ia katei ka surok, khnang ba kan long ka jingmyntoi ia ki spah tylli ki shnong kiba don ha katei ka thain.