pyrshah Wine Store
Nongpoh: Ki nongialam shnong ha ryngkat ki paidbah na 3 tylli ki shnong kiba don hajan Nongpoh, kiba kynthup ia ka shnong Nongkhrah, Lumbyrhing bad Umrangksai, myn hynnin ka sngi ki la iamih paidbah, na ka bynta ban pyrshah jur halor ka jingthmu ban plie noh ia ka Wine Store u Bah Cornelius Kharhunai, uba la thmu ban buh ha kawei ka jaka kaba don harud ka surokbah NH-6 bad kaba don hapdeng u pud u sam ka shnong Nongkhrah bad Umryngksai.
Ha katei ka sngi ba kitei ki nongialam shnong bad ki paidbah na kitei ki shnong ki la mih paidbah ban pyrshah ia katei ka dukan Kyiad, la wan ban synran ruh da ki nongialam ka RBYF, ha kaba ki la shim da kawei ka sur ba kin pyrshah beit ia katei ka dukan Kyiad kaba la thmu ban plie ha katei ka jaka, da kaba ki la pynpaw ruh ia ka sur ba da lei lei kim pdiang ba katei ka Wine Store kan don ha katei ka jaka.
Ki nongialam shnong na kitei ki 3 shnong, kiba kynthup ia u Bah Donbok Kharshandi Rangbah Shnong ka Umrangksai, nangta u Bah Celestine Syngkli Rangbah Shnong Nongkhrah bad u Bah Banaijingsuk Khongdup Asst. Rangbah Shnong ka Lumbyrhing, ki la pynpaw ba kum ki nongialam shnong ki dap da ka jingsngewkhia halor ka jingthmu buh dukan Kyiad ha katei ka jaka, da kaba ong ba lada don katei ka dukan Kyiad, ka sa kylla long kum ka jaka ba hikai pyndih naduh ki khynnah rit bad kaba lah ban wanrah jingjot ha ka imlang sahlang.
Katkum ka jingiathuh da kitei ki nongialam shnong, ki la ong ba ki la ioh jingtip ba ia ka NOC na ka bynta ban buh dukan Kyiad ha katei ka jaka, la ai da da ka shnong Pahammardoloi bad ka public hearing ruh la leh ha katei hi ka shnong, kaba don ia ka jngai kumba 3km ei ei na katei ka jaka ba buh wine store bad kaba la pynlyngoh eh ia ki nongialam shnong bad paidbah na kitei ki shnong, ka dei hadien ba ki la wanbuh pat ia katei ka dukan Kyiad ha katei ka jaka, kaba kum ki nongialam shnong bad paidbah kim don jingtip ei ei ruh em bad khlem kano kano ka jingpan jingbit na ki bor shnong, la ka long na ka shnong Umrangksai ne Nongkhrah.
Kitei ki nongialam shnong, ki la kynnoh ruh ba halor kitei ki kam baroh, la leh khiehshrieh da u Bah Ampliwell Thangkhiew lem bad kiwei, namar ki la pynioh NOC na kawei ka shnong bad kiba la thmu pat ban buh ia katei ka dukan die Kyaid ha katei ka shnong, kaba la jngai bah na ka shnong Pahammardoloi, kaba mut ba ka NOC kaba la ai da kawei ka shnong, la pyntreikam pat ha kawei ka shnong.
Haba iadei bad katei ka jingthmu buh dukan Kyiad ha katei ka jaka, ki nongialam shnong ki la kynnoh ba baroh katei ka kam, ka dei ka jingleh sop sop jong ka Raid bad leh buit tuh ia katei ka jaka ban pynhap sha kawei pat ka shnong bad kumba ka long haduh kine ki sngi kim shym la shlan ruh ban wan mih ban pynshai paidbah.
Nalor kitei ki nongialam shnong, u samla Bawan Marwein, nongialam ka RBYF Laishnong Unit, u la pynpaw ba kum ka seng ka pyrshah jur bad ryngkat ka sur u paidbah kin iengskhem ban pyrshah halor katei ka jingthmu ban plie noh ia katei ka dukan kyiad khlem ka jingtip jong ka shnong da kaba pan NOC na kawei pat ka shnong kaba long kum ka jingiuhroit ia ki Dorbar Shnong.
Lah ruh ban kdew hangne, ba halor katei ka dukan Kyiad, naduh ha ki bnai kiba la dep ka Joint Action Committee jong ka shnong Lumbyrhing bad Umrangksai, kiba hap hapoh ka Raid Nongkhrah Nongpoh Sirdarship Elaka, ki la dep ban mudui sha ka Deputy Commissioner ka Ri-Bhoi District, na ka bynta ban pynpaw ia ka jingpyrshah halor ka jingthmu buh wine store ha katei ka jaka, hynrei ki khlem tip ba katei ka kam wat hapdeng ka jingpyrshah da kitei ki shnong, hynrei ka la iaid beit napoh napoh bad dei halor kata ka nongrim kaba la pynbitar eh ia ki paidbah, haba ki la tip ba katei ka dukan Kyiad kan sa plie noh shen.
Phi don ban ong eiei?