Mih ki nongialam shnong ka thain Umtyrnga ban pyrshah, halor ka jingpyniaid na ka jaka bym dei ia ka surok ba T. 84 klur

Nongpoh: Ki la don ki paidbah na ki katto katne tylli ki shnong kiba don ha ka thain Umtyrnga ha Ri Bhoi, hynnin ka sngi ki la iamih paidbah, na ka bynta ban pynpaw ia ka jingpyrshah kaba jur halor ka jingpyniaid na ka jaka bym dei ia ka surok na Baridua sha Umsen, kaba dei ka surok kaba la pynmang ha ka jinglut kaba la kot sha ka T. 84 klur.

Ban pyrshah halor katei ka jingpyniaid bakla na ka lynti bym dei ban iaid ia katei ka surok, ki nongialam shnong na ki katto katne tylli ki shnong ka thain Umtyrnga, ki la iamih paidbah ha shnong Chibra, Umtyrnga bad ha ka jingkren jong kitei kiba pyrshah ia katei ka rukom pyniaid ia katei ka surok, ki la ong ba lada katei ka surok kan na katei kaba la thmu ban pyniaid mynta, kan pynmyntoi tang ia ar-tylli ki shnong, hynrei lada ki iaid na kaei ka jaka kaba katei ka surok ka dei ban iaid, kan sa pynmyntoi ia palat phew tylli ki shnong kiba don ha katei ka thain, kaba dei ruh ka thain kaba iajan eh bad ka jylla Assam.

Ki nongkren ha katei ka sngi, kiba kynthup naduh u Chobin J. Sangma, Rangbah shnong ka Chibra, u Monu Arengh na Nagrabil, u Bosco Nongrum na Umlathu lem bad ka Rikumuni Marak, kaba dei kawei na ki nongialam ha ki paid Garo, ki la pynpaw ia ka jingsngewkhia kaba jur halor ka jingshah pynkynriah ia katei ka surok, da kaba ong ba lada katei ka surok kan iaid na ka jaka kaba la dep ban ‘Survey’ kan pynmyntoi ia kiba bun tylli ki shnong, hynrei lada ka iaid na kaei kaba la thmu mynta kan pynmyntoi tang ia ki ar-tylli ki shnong ha katei ka thain.

Lada katei ka surok kan iaid na katei ka jaka kaba la dep ban leit thew leit woh ‘Survey’ kan sa pynmyntoi ia ki bun tylli ki shnong, kiba kynthup ia ka shnong Chibra, Jorsyiem, Nagrabil, Jyrmang, Pillingku A bad B, ka Tamalbari A bad B, ka Pahamjila, Umlathu, Pynker C, Pynker A bad shaduh Umsen, hynrei lada kan iaid na kaei kaba ki la pyntrei mynta, ka long ba kan pynmyntoi tang ia ki artylli ki shnong, kiba kynthup ia ka shong Bainanodi bad Pynker B, kaba kitei ki briew kiba pyrshah, ki la ong ba kitei ki shnong ki dei ki shong duna bha ha ka jingdon briew ban haba ianujor bad kitei kiwei pat ki shnong.

Namarkata, haba iadei bad katei ka jingpyrshah halor ka jingpyniaid ia katei ka surok na ka jaka bym dei, kitei ki nongialam ba paw khmat na ka jaid bynriew Garo bad Khasi ruh kumjuh, ki la dawa na ka sorkar jylla bad na ka tnat PWD ruh kumjuh, ba ki dei ban pyniaid ia katei ka surok lyngba ka jaka kaba kitei ki shnong kin iaid lyngba, khnang ba kan pynsuk ia ki paidbah kiba sah kitei ki shnong kiba la don da ki phew tylli.

Kitei ki nongiakhih kiba la mih paidbha hynne ka sngi, ki la byrngem ruh ba lad aka sorkar bad ka tnat PWD kim lah ban pynurlong ia ka jingangnud u paid ba bun balang, kim banse ban shim da ka sienjam kaba kham tyngeh, wat lada ka long ba kin leit ban pynsangeh jubor ia katei ka jingpyntrei ia katei ka surok, kaba la pyniaid na ka jaka kaba ym dei ban iaid.