Mih ki karkhana Coke, ba ïoh pahuh dewïong, ong u nongbishar

Tura:U Justice BP Katakey, Judge ka National Green Tribunal (NGT) ïa uba la thung da ka Ïingkashari Meghalaya High Court ban khlieh ïa ka Committee halor ki kam dewïong ha Jylla, ula ong ba ka jingmih ki karkhana coke ba beaiñ ba kum ki tit ha West Khasi Hills bad East Jaiñtia Hills, ka la urlong namar ka jingïoh pahuh ïa u Dewïong bala tih beaiñ ha ka thaiñ la bun snem mynta.

U Katakey uba la don ha Ri-lum Garo ban lum jingtip ïa ka jingtih dewïong thliew khnai ha Ri-lum Garo, ula ïathuh ba ka jingleit survey ïa ki jaka tih dewïong lyngba ki drone kan ïarap bha ban pynthikna ïa ka jingpynduhjait ïa ka kam tih dewïong ba beaiñ, bynrap u Justice BP Katakey.

U Justice Katakey ula poi ha ka sngi Balang ha South Garo Hills District ban pynthikna ïa ki jingkynnoh tih dewïong beaiñ halor ka jingjur ka jingujor na ki kynhun sengbhalang bad nongmihkhmat paidbah haba ïadei bad ka jingtih dewïong beaiñ ha ki thaiñ Nangalbibra.
“Namar ka jingtih dewïong beaiñ bad jingkhaiï, katto katne ki karkhana kila mih beaiñ khamtam ki karkhana coke bad ki ferro alloy bad kiba bun na kine ki dei kiba don ha ka thaiñ Shallang, West Khasi Hills bad East Jaiñtia Hills. Ki karkhana coke kila mih kum ki tit ha ki jaka ba jur ka kam tih dewiong beain,” bynrap u Justice Katakey bad pynpaw ba palat 50 tylli ki karkhana coke beaiñ kiba la treikam, kila shah khang khyrdep ha ka NGT ha ka por jong u kum u Judge.

“Katto katne na kine ki karkhana ki dei kiba la ïoh jingbit na ka Sorkar hynrei don ruh ki bym pat ïoh jingbit hynrei kim shym la ïoh pat ïa ka jingbit na ka Pollution Control Board,” ula pynpaw haba suba jur ba ka don ka jing?atreikam lang hapdeng ki Heh Sorkar bad ki bor Sorkar bad kane ka kam.

U Justice Katakey haba ïakren bad ki nongthoh khubor ha Baghmata, ula ong ba ula wan sha kane ka District ban lum ïa ki jingtip halor ki jingkynnoh ba jur ka jingtih dewïong beaiñ.
“Nga la ïoh pdiang ïa ki jingujor na ki nongshong shnong ka Ri-lum Garo halor ka kam tih dewïong beaiñ, na kata ka daw nga la wan hi dalade sha kane ka jaka,” ula ong.