Mih ki jingkylli halor ka jinglong nongïalam u Bah Pala, ba hiar jur ka Congress

Shillong:Ka jingshah suspon ba dangshen na ka jinglong dkhot ïa ki arngut ki MLA Congress MLA ha ka jylla ka la pynmih ki jingkylli halor ka jinglong jingman ka Congress party hapoh ka jingïalam jong u President ka Meghalaya Pradesh Congress Committee (MPCC) u Bah Vincent Pala.

Lah ban kdew ba ha ka 15 tarik mynta u bnai ka Congress party ka la suspon na ka jinglong dkhot ïa u MLA ka Nongstoiñ u Bah Gabriel Wahlang bad u MLA ka Mawhati u Bah Charles Marngar na ka bynta 6 snem ba kynnoh ba ki la ïaleh pyrshah party halor ka kaiphod ba kine ki MLA ki la pyrkhat ban pynïasoh sha ka NPP.
Lah ruh ban ong ba baroh arngut u Bah Wahlang bad u Bah Marngar kidei ruh ki MDC jong ka Congress ha Khasi Hills Autonomous District Council.

Ka shah suspon kine ki 2 ngut ki MLA ka la wan ruh ha ka por ba ka Congress ka la don ha ka jinglong jingman jong ka hiar ha ka saiñ pyrthei khamtam da kaba rem ha ka Lok Sabha election ha Shillong parliamentary seat ha kaba u Bah Pala, u la long MP lah 3 sien u la shah pynliem noh ha Ricky Andrew J. Syngkon ka VPP.
Katkum ki nongpeit pyrman ka saiñ pyrthei ki la ong ba u Bah Pala u khlem lah ban pynmih biang ïa ka party ha ka jylla naduh ba u la shah thung kum u President ka MPCC ha ka 25 tarik u Nailar, 2021.

Kadei ruh hapoh ka jingïalam jong u ba ka Congress ka la duh noh ïa 12 ngut ki MLA ha u Naiwieng, 2021 ha kaba u Myntri Rangbah barim ka jylla u Dr. Mukul Sangma bad 11 ngut kiwei ki MLA Congress ki la iehnoh kam na ka party bad ki la pynïasoh bad ka Trinamool Congress.
Kham hadien ha u bnai Rymphang, 2022, 5 ngut kiwei pat ki MLA ba dangsah ka Kong Ampareen Lyngdoh, Mayralborn Syiem, Mohendro Rapsang, Kimfa Marbaniang bad Bah Process T. Sawkmie ki la pynbna bad ki la rai ban kyrshan ïa ka sorkar ba la ïalam da ka NPP ka Meghalaya Democratic Alliance (MDA).
Nangta u Bah Pala u la rem ïalade ha ka Assembly election ha u snem 2023 na Sutnga-Saipung constituency ha ka Kong Santa Mary Shylla ka NPP ha kaba kane ka kren bun halor ki jingduna ki jingpaw khmat jong u.

Ki nongïalam ka Party ki la sngew ba ka Congress high command kadei ban khmihbniah bha halor ka jinghiar ka party ha Meghalaya bad ka jingduna ka jinglong jingman hapoh ka jingïalam u Bah Pala.
“U la dei ban kam ïalade halor kane ka jingpulom jong u ban bat lang ïa ki MLA baroh. Ha ka jingshisha hadien ba ma u hi u la rem ha ka Assembly poll, um don hok shuh ban bteng kum u State party president,” ong u Nongïalam ka party u bym kwah ban pynpaw kyrteng.
Katto katne ki dkhot ka Congress ki la ong ba u Bah Pala u don bun ki jinglong kum u nongkhaïi ban kum u Nongïalam saiñ pyrthei.