Mih ka sur ban pyrshah halor ka Weighbridge ha Nongpoh

Nongpoh, 20 Naitung: “Ngin ym ailad ia ka sorkar ba kan buh Weighbridge ha katei ka jaka (ha phyllaw ka ophis u DTO Nongpoh)” mih ka sur na ki nongialam ka Nongpoh Town Committee (NTC), nongialam ka Dorbar ki Rangbah Shnong Ri Bhoi District (DRSRBD), ki nongialam sengbhalang bad na ki paid nongshong shnong ka Umlyngkdait, ha ka jingialang paidbah kaba la long mynta ka sngi shnong Umlyngkdait.
Ha kane ka jingialang paidbah ban shim ia ka rai halor katei ka Weighbridge, la wanban iashim bynta da nongialam ka NTC, DRSRBD bad ki kynhun sengbhalang kiba la wan iasnohktilang ha kane ka jingialang ki kynthup ia ka KSU, HNYF, FKJGP bad RBYF ha ryngkat ka jingdon jong ki spah ngut paidbah na ka shnong Umlyngkdait bad na ki thain Nongpoh.
Ha kane ka sngi kitei ki kynhun sengbhalang lem bad ki paidbah ki la ai ia ka jingkyrshan kaba pura ia ka nongrim ba la ieng pyrshah da ka NTC, halor ka jingthmu ka sorkar ban buh Weighbridge ha phyllaw ka ophis u DTO, Nongpoh bad na ka liang ki kynhun sengbhalang, ki paidbah kiba la wan ha kane ka sngi, ki la kyntu ruh ia ka NTC ba kan bteng beit shakhmat ia ka jingpyrshah.
La ioh ruh ia ka jingpynshai na ki nongialam seng, kiba kynthup ia u Bah Lambok Rymbai, General Secretary ka KSU, NKD, u Bah Markus Marten, President ka HNYF, Northern Region, u Bah Balawan Mawein, Nongialam ka RBYF, u Bah Ricky Majaw, General Secretary ka FKJGP, Nongpoh Circle, u Bah Rayonald Kharkamni, nongkitkam ka NTC, u Bah Opel Lyngdoh, Rangbah Shnng ka Mawroh, ha kajuh ka por la ioh ruh ia ka jingpyshai kaba kham janai na u Bah Rocky Kylla, Chairman ka DRSRBD bad na u Bah C.B Syiem, Chairman ka NTC.
Ha kane ka jingpynshai uwei hadien uwei, la mih ruh ka jingpynrem kaba jur ia ka sorkar jylla, kaba la lamkhmat da u Dr. Mukul Sangma, namar ka jingleh donbor bad ha kajuh ka por ka la mih ruh ka pynrem halor ka mynthi da ki nongmihkhmat na Ri Bhoi, kata naduh ki MLA bad MDC bad kumjuh ruh ia u Myntri ka Tnad Transport jong ka sorkar jylla.
Lah ban ong hangne, ba naduh ba ka sorkar ka la thmu ban ia katei ka Weighbridge ha phyllaw DTO, Nongpoh, ka la mih ka jingpyshah kaba jur na ki nongialam ka NTC bad ka DRSRBD ban buh ia katei ka Weighbridge ha katei ka jaka, ha kaba na ka liang ka NTC ka la phah ruh da ka jingthoh sha u Myntri ka tnad Transport ban pynpaw ia ka jingbymhun halor ka jingthmu ka sorkar ban Weighbridge ha katei ka jaka, hynrei ka long pat kaei kaei kaba pynlyngoh ba kat haduh mynta ka sorkar kam shem la ai jubab halor jong katei ka phang.