Mih ka shnong Nepali ha Porkut na ki nongbylla tih dewiong

Shillong, 12 Nohprah:
Ym tang ha sor ka jingbun ki jaitbynriew Nepali hynrei kaba sngew phylla ka long ba wat sha ka thain kaba jngai bah na sor ki shnong ba sah ki Nepali ki don bad kane la lah ban iohi ha shnong Porkut kaba hap ha ka thain Nongjri ka South West Khasi ha kaba ka don ka shnong ba thaw bad sah da ki Nepali.
Katkum ka jing iathuh ki briew katei ka thain, ia kane ka shnong kaba tip kum ka Nepali Colony la sah tang ki Nepali kiba shu wan bylla tih dewiong mynshwa hynrei mynta ki la pynlong shnong syndon.
Kane ka jaka ba sah da ki jaitbynriew Nepali ka don kumba 30-40 tnem iing eiei. Ym tip ha kano ka dur ki ioh ban thaw shnong hynrei ki bor ba dei peit jong katei ka thain kin tip kham bha halor kane.
Ka thain Nongjri, Kulang ka dei kawei ka ktem par dewiong bad kine ki jaitbynriew Nepali ki wan kharoi sha katei ka jaka lyngba ka kam bylla hynrei hadduh mynta ba la khang dewiong, ki la sah ha katei ka shnong bad ki la kylla nongshong shnong syndon da kaba thaw shnong.