Mih ka seng shitniam Hindu, ban pyrshah ia ka jingtei mot Jisu ha Karnataka

Mynta ka sngi, la pynlong ia ka jingialang kaba radbah, ha kaba la ialam khmat da ka seng shitniam Hindu, ba la kyrshan da ka BJP, RSS, ha ka nongbah Kanakapura jong ka Ramanagara district ha Karnataka bad ka jingmut jong katei ka jingialang ka long ban pyrshah jur halor ka jingthmu ban tei ia ka dur mot U Jisu, da ki nongshong shnong ha katei ka jaka.

Kitei ki nongshim bynta ki jer ia katei ka jingleit kum ka ‘Kanakapura Chalo’ bad la lam khmat da ka Hindu Jagarana Vedike bad la kynnoh da kitei ki nongialam ba U MLA jong ka Congress, U D K Shivakumar, ba u don kti ha ka politiks pynsngewbha briew, da kaba u leit buh maw nongrim ban shna ia ka dur mot U Jisu, kaba jrong 114 phut ha ka jingrakhe Khristmas ba ladep bad ia utei u dur mot, yn tei ha ka shnong Harobele jong ka Kapalabetta.

“Ki paidbah hangne, kim kwah dur Jisu, hynrei ngi kwah da ka dur U Pejawar Swami, Basaveshwara, Balagangadharanatha Swami lane uno uno uba la noh bynta ha kane ka thain bad ha ka ri hi baroh kawei” ong U Kalladka Prabhakar Bhat, nongialam ka RSS.

U Bhat, u ong ruh ba ka jingthaw dur mot Jisu, ka dei tang ka buit pynsngew bha jong U Shivakumar, ia ka Sonia Gandhi.